Friday, October 05, 2007

انفراد: آخر كفار قريش يتحدث

في إطار انفراداتها المتتالية، تفرد المدونة هذه المرة صفحاتها لتقديم حوار صحفي مع أحد كفار قريش ممن عاصروا دخول الإسلام وانتشاره. يصرح مصدرنا، والذي رفض ذكر اسمه تماما أو حتى ملابسات اللقاء، بعدد من الحقائق كفيلة بتغيير نظرتنا لتاريخ شبه الجزيرة العربية في القرن السادس وأن تكون ردا على من يحاولون التشكيك بأن الكفار كفار أما المسلمون، بطبيعة الحال، فهم المسلمون

.................

لا. يا باشا هو احنا كنا قاعدين نتفرج؟ والله شوف. لا يكلف الله نفسا الا وسعها، واحنا عملنا اللي نقدر عليه علشان نمنع انتشار الإسلام، مفيش حد بقى ييجي يقولنا كنتو مقصرين وبتاع.

.................

كنا بنقعد في قهوة جنب الكعبة ندرس الموضوع. اهم حاجة كنا عاوزين نعرف هما ازاي بيلموا الناس لدين الاسلام، دا كان استقطاب رسمي. قعدنا نتكلم عن الحكاية دي بتاع سنتين، وهو كان في يثرب لمؤاخذة. ماكانش موجود يعني.

.................

اه.. عندنا خطط لو بس كات اتطبقت كان الكفر هيسود في الدنيا كلها. احنا كان معانا عيال جامدة ودماغها شغالة. سيبك من الناس ابو جهل وابو لهب وبتاع. الشغل الاصلي كان عندنا احنا.

.................

دول كانوا زي ما تقول كدا نجوم، يعني محدش يعرف يكلمهم وفاكرين ان هما اللي ممشيين ام البشرية ولولاهم ماكانش هيبقى فيه كفر في العالم، هما كانوا فرحانين ان اساميهم اتذكرت في القرآن وبتاع، بس وحياة المصحف الشريف ان العالم دي عالم رمة وزبالة كفار قريش وان الناس اللي بجد هما الناس بتوعنا احنا.

.................

إديني إنت عقلك يا أستاذ. دا راجل معاه ربنا واحنا حيالّه ناس كفار، يعني واسطتنا في الدنيا شوية الهة لا تضر ولا تنفع، يعني بالعقل، مين فينا اللي ربنا هينصره؟ ابو اله حقيقي طبعا. المسألة واسطة يعني. انا شايف ان غلطتنا اننا ما اتفقناش الاول مع الناس بتوع الاسلام على لعب نضيف، يعني من غير آلهة ومعجزات وحوارات من دي. لو دا حصل، كنت شوف بقى يا برنس احنا ممكن نعمل ايه. كات كل حاجة هتتغير يا معلم.

.................

احنا كنا بنعرف ان الراجل من بتوعنا دخل الاسلام لما كنا بنشوف وشه باسم الله ما شاء الله نوّر وبقى يلبس ابيض وبقى يتكلم كلام كله إيمان وموعظة يخليك عاوز تعيط.

.................

أه طبعا. اليهود والنصارى كانوا حبايبنا. ما هما دول اللي ربنا سبحانه وتعالى سماهم المنافقين، أمال الكفار، اللي هما احنا، كانوا بيحبوهم ليه؟

.................

أمال إيه يا أستاذ؟ يعني انت فكرك محمد رسول الله جا يقول لنا خشوا في الاسلام كل الناس خشت. عيب يا باشا دانت راجل متعلم. احنا كان أهم حاجة مثلا عندنا الشرك بالله الواحد الأحد وعبادة الاصنام، تاني حاجة النسوان والخمرة، تالت حاجة، ان الناس بتوع الاسلام كانوا نحانيح، يقعدوا يقولوا العدل واحنا كنا نحب الظلم زي عينينا، رابع حاجة ان شكلنا كان يقرف وحواجبنا تخينة ولمؤاخذة الراجل مننا لما يضحك تحس انك عاوز ترجع. دي كات حاجات احنا استحالة نتنازل عنها ولو دبحونا دبح.

28 comments:

كريم بهي said...

انفرااااااااااااااااد
انا اول واحد بعلق
للفوز بالشرف

بجد افكارك جديدة وكانك بتدور على شكل كتابة جديد

ربنا معاك
هو يعنى ايه
ان عبدالناصر لم يمت
!!!!!!!!!!!!!

كريم بهي

coffee break said...

يعنى إنت من وجهة نظرك إن اليهود و المسيحيين منافقين و حبايب كفار قريش؟

Tamer said...

جديدة
بس اللي ضحكني فيهاالحتة دي

"احنا كنا بنعرف ان الراجل من بتوعنا دخل الاسلام لما كنا بنشوف وشه باسم الله ما شاء الله نوّر وبقى يلبس ابيض وبقى يتكلم كلام كله إيمان وموعظة يخليك عاوز تعيط"

عاملة زي الأفلام العربي
الكافر بيلبس اسود و حواجبه تخينة و مكياجه غامق و بياكل فخدة خروف و حواليه ستات و المسلمين بيلبسوا أبيض و شكلهم حلو و ولاد ناس

حلوه

Anonymous said...

لعنك الله انت و البضاينة من امثالك
حقيقى بضان
يخرب بيت أمك

fawest said...

ممتع
عدو لطيف للأنسانية صحيح
أوعوا يقتبسوا حاجة _بتوع الاسلام-و يغيروا فى الحوار و تبقى انت الكافر


ههههههههههههههههههى

عباس العبد said...

" أه طبعا. اليهود والنصارى كانوا حبايبنا. ما هما دول اللي ربنا سبحانه وتعالى سماهم المنافقين، أمال الكفار، اللي هما احنا، كانوا بيحبوهم ليه؟ "

تصدق يا نائل
و بما انى من النصارى
انا مش عارف بحبك ليه ؟
دلوقتى عرفت
حبيبى يا نائل حبيى
هههههههههههه

nael said...

كريم بهي
الله يخليك يا دكتور

كافيه بريك
طبعا لا. التدوينة ساخرة. ومزعج جدا ان الواحد يضطر يشرح دا

:(

تامر
فعلا لولا الافلام العربي لم يكن هذا الحوار الصحفي ليخرج للنور


فاوست
يا عم انا مالي. انا راجل صحفي عملت حوار مع احد الكفار. ذنبي ايه بقى :). وكما تعرف يا اخ فاوست ان ناقل، أو نائل، الكفر ليس بكافر
:)

عباس العبد
هع هع هعععععععععععععععع
حبيبي وابن حبيبي طول عمرك يا زميل
:))))))))))

Mirage said...

أه طبعا. اليهود والنصارى كانوا حبايبنا. ما هما دول اللي ربنا سبحانه وتعالى سماهم المنافقين،

إيه الكلام الفارغ ده يا أستاذ يامتعلم يابتاع المدارس ؟

bluestone said...

أولا تحية للصحفي "الأمين" الذي استنطق الايمان من الكافر والعياذ بالله ...

بصراحة يا استاذ نائل يعني المشكلة كانت في الكفار بقى .. يعني مش ممكن .. ده منظر ؟؟ دي اشكال؟؟؟
شعر طويل وحواجب تقيلة وكلهم خان ومربربين ..
واليوم خمر ونساء وغدا .. انت عارف بقى
طبعا دول الكفار ولاد الايه بأشكالهم المهببة دي مينفعش برضه يؤمنوا .. دي اشكالهم لوحدها ازدراء للاديان يا أخي ..

على العموم برضه تحياتي للصحفي الوطني المؤمن

واحدة وخلاص said...

ايوة الكافر ده بقى طالع من انهى فيلم ؟؟؟؟؟؟؟؟؟
دايما بتغاظ من السذاجة اللى بيصور بيها الكفار فى الافلام اللى بيعتقدوا انها دينية دى
بس بصراحة التدوينة حكاية
تانى
استاذ نائل ... ما ابدعك

اسلام أمين said...

انا مش قادر أمسك نفسي من الضحك و تدوينةهايلة

:)

Reham R. said...

أنا شايفة ان غلطتهم انهم متفقوش من الأول مع الناس بتوع الإسلام على لعب نضيف.. كنت شوف بأة يابرنس كانوا عملوا ايه! وكان زماننا كلنا فين دلوقتي!!!
مبروك على السبق الصحفي!

تحاول إرتداء فستان الخامسة .. لكن قياس المعرفة يمنعها said...

واضح انك كنت بتحاور سواق (ناقة-باص) خمشتاشر راكب عشان الكنبة الورانية أربعة راكب
--------
أعتقد أن التاريخ نقل العصر الجاهلى نقل أمين
لكننا العقدة فينا نحن
....

h shady said...

طبعاً إزاى يتنازلوا عن الحاجات دى كلها
بس معاه حق أهم حاجه اللعب النضيف

nael said...

بلو ستون
تحيتك للصحفي الامين وصلتله خلاص. بيقولك انه مش عاوز تحية على واجب، واجب الامانة ونصرة الاسلام في نفس الوقت، او بشكل ادق، الامانة على قدر ما يقتضيه واجب نصرة الاسلام
:)

واحدة وخلاص
طب ليه بتتغاظي.. ليه متشوفيش الجانب الكوميدي في الموضوع.. السينما بتقدملك اللي عمرك ما هتشوفيه طول عمرك.. كائن يمثل الشر النقي والخالص اللي عارف ومعترف انه شر.. بيتهيالي فانتازيا زي كدا مش ممكن نلاقيها الا في السينما

اسلام امين
الله يخليك. اتفضل
:)

ريهام رجب
الله يبارك فيكي
:)))

تحاول ارتداء فستان الخامسة
بيتهيالي ان المشكلة فينا وفي اللي قبلنا. واقصد باللي قبلنا الناس اللي كانوا مسئولين عن نقل التاريخ ايضا بامانة.. لان التاريخ مبيتحركش لوحده انما فيه بشر هما اللي بيأرخوا وبتتنازعهم الاهواء وزي باقي البشر بيبقوا حابين يشوفوا الاسود اسود غطيس والابيض ابيض مزهزه وبيتخنقوا من الوسط زينا كلنا
وبالتالي بيقوموا بدورهم القومي في تشويه التاريخ
بس. بيتهيالي هي دي الحدوتة

حسام شادي
مش كدا والنبي؟

جبهة التهييس الشعبية said...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

يخرب بيت مخك
انت بتجيب الافكار دي منين؟

ألِف said...

القرشي دا قابض.
أنا شفته و هو بياخد صاعين تمر ورا قهوة الندوة من بن عوف.

و تلاقيه هو المستشار الفني للتلفزيون كمان.

Reham R. said...

صورة الطفلة اللي ع البانر الرئيسي اللي حاطة ايدها على خدها.. ممكن أستعيرها منك؟ وأحييك على اختيارها أولا لأنها في منتهى الجمال وثانيا لأن الطفولة من القلائل التي تتمتع بالنقاء في العالم ده، أنا حاولت اعملها كوبي وفشلت.. ممكن تعرفني ازاي اقدر اخدها بعد ماتوافق طبعا..

Anonymous said...

حسبنا الله ونعم الوكيل

nael said...

جبهة التهييس
مش عارف والله انت ايه رايك؟
:)

الف
بالزبط. تدوينة الست نعامة من المراجع المهمة للتليفزيون وللقرشي كمان

ريهام
بيتهيالي ممكن تدوسي يمين على الصورة وتعملي سيف باكجراوند از

لو منفعتش الطريقة دي ابعتيلي على الميل اللي في البروفايل بتاعي

باسم شرف said...

الكاتب الساخر نائل الطوخي
مرحبا بك في عالم الافيهات

جميل ومضحك جدا
برافو عليك يامعلم

Reham R. said...

اسفة على كثرة التعليقات!! الطريقة نجحت. حاولت أبعت لك شكر ع الايميل حسيت اني بسطب ويندوز! وفي الاخر قاللي failed
بس ده غالبا عشان انا عندي مشاكل
المهم.. شكرااااااا

مصطفى محمد said...

صورة الفتاة الأرمنية جميلة جداً لدرجة مش فاهمها

جبهة التهييس الشعبية said...

سؤال بس بيطرح نفسه بقوة
انتش بتشحرج تشبعيتشي ليه يا كابتشن

انا مش باعرف ادخل عندك المدونة من الصور السلبوتة دي

ما يغركش منظري انا باتكسف برضه زي بيقية البيني ادمين

nael said...

باسم
دي شهادة اعتز بيها من باشافيهجي قد الدنيا زي حضرتك يا فندم

ريهام
العفو يا ست الكل

مصطفى
ولا انا فاهمها صدقني

جبهة التهييس
يا باشا باقي البني ادمين هما اللي زيك
عموما كان نفسي بس اتأكد من معلومة انك بتتحرجي وبعدين هابقي احط صور لبنات كلهم بنقاب

Anonymous said...

بطل تتفرج على افلام عربى كتير علشان تبطل سطحية ف كتاباتك والطريقة الساخرة اللى بتكتب بيها دمها تقيل جدا

صديقة كافرة said...

أعتقد أنك تخفي وراء كتاباتك إلحاداً حاد الذكاء، واحتقاراً لا يخفى على عليم بالدين وملحقاته.
يعني معك حق، مين قال مثلاً إنو الكفار كانوا بشعين ومخيفين والمبشرين بالاسلاموجوهن منورة وما إلى ذلك؟؟
أحييك من قلبي.

Anonymous said...

من شاء فاليؤمن ومن شاء فاليكفر فالله غني عنا ونحن الفقراء الى الله
لكن لاتعمى العيون ولكن تعمى القلوب اللتي في الصدور
حسبنا الله ونعم الوكيل