Friday, October 03, 2008

نداء أخير إلى أم ماريو وآندرو: دا الإسلام دا دين جميل والله

في الفيديو، الذي قام بتصويره موقع أقباط متحدون وأتاحه للتحميل على صفحته الرئيسية، تندهش السيدة كاميليا –أم ماريو وأندرو- لسير إجراءات المحكمة، تشير إلى الزوجة المسلمة لطليقها:

وبعدين جاية بتشهد بتقول ايه، بتقول ان هي، بتشهد على اسلام مدحت. القضية، فعلا الحكم تشوفه تلاقيها دي قضية اثبات اسلام، مش قضية ضم خالص، ماحدش اتكلم عن صلاحية الاب للضم للحضانة، كل الكلام على انه مسلم او مش مسلم . كون ان هو صالح للحضانة ولا مش صالح، كون ان نفسية الولاد اللي انت بتسحبهم وبتنزعهم من والدتهم وبتديهم لمرات الاب علنا، ماشفتهاش انا ف قضية ضم، منافية لكل القواعد النفسية بتاعتي كمان.

***

معلش يا دكتورة. قلبي معاكي والله. انا كمان زعلان، لبش وكلام فارغ. الإسلام دين السلام، دين مالوش ف اللبش، بس ساعات اللبش بيبقى ضروري، هانعمل إيه بقى؟

اسمحيلي بس ألفت نظرك لخطأ بالغ حضرتك وقعتي فيه: حضرتك متضايقة إن المحكمة كات بتتكلم عن اسلام الأب مش عن الحضانة، اللي هي أساس الدعوة. ودا لإن تفكير حضرتك، يعني ممكن نقول، قاصر شوية، يعني مابتشوفيش المسائل من كل النواحي، وإذا شفتيها مابتربطيش بينها، زي ما احنا بنعمل.

المهم، خليني افكرك بمعلومة: أنا كمسلم، راجل بؤمن باليهودية والمسيحية والإسلام، بينما حضرتك كمسيحية بتؤمني بالمسيحية واليهودية بس، صح كدا؟ يعني أنا في الإسلام عندي حتة جامدة بتقول: "لا نفرق بين أحد من رسله". يعني إيه بقى، يعني انا عندي سيدنا عيسى زي خير الخلق أجمعين رسول الله عليه أفضل الصلاة والسلام، خدتيلي بالك من سماحة الإسلام!؟ يعني انا لما اكون لامؤاخذة أب مسلم يبقى أنا مؤتمن على ابني، حتى لو كان مسيحي، لأن لو هتقولي لي يا مسيحية اقولك انا مسيحي احسن من اتخن تخين ف الكنيسة بتاعتكو. شفتي بقى الكلام!؟ ليه بقى؟ لأن انا عندي الانجيل الصحيح، مش المحرف، وعندي ان سيدنا عيسى عليه السلام قال ابشركم بنبي يأتي من بعدي اسمه سيدنا محمد صلى الله عليه وسلم، فقالوا كيف يا سيدنا عيسى فقال هو كدا. بينما انتو الناس القساوسة بتوعكو ضحكو عليكوا وقالولكو مافيش الكلام دا، وبعد كدا يرجع يقولك ايران دي عندها سلاح نووي. الله! ماتشوفوا اسرائيل ولا جيتو عندها وعميتو!؟ مافيش بيننا زعل يا ست كاميليا احنا بنفضفض.

الإسلام دا دين عقلاني، ورسول الله عليه الصلاتو والسلام قالك يكون عهد على أمتي يكونون فيه كثرة فقالوا كيف يا رسول الله فقال كثرة كغثاء السيل. يعني بالبلدي كدا علشان اقربلك التشبيه اقولك العدد ف اللمون. معناه ايه الكلام دا؟ معناه ان الاسلام مش هيزيد بواحد يدخل فيه ولا هيقل بواحد يخرج منه. ولذلك تلاقي زي ما حضرتك قلتي، الناس ف المحكمة كانوا بيثبتوا بالادلة والبراهين القاطعة ان الراجل جوزك كان مسلم بجد، مش مسلم اي كلام، مع ان كان سهل اوي الراجل اول ما ينطق الشهادتين يبقى كدا حاجة حلوة والناس تفرح وتنبسط وخلاص على كدا، انما لأ، المسلمين دول ناس منطقيين. ويبعد كدا يرجع ويقولك الاسلام انتشر بحد السيف. حسبي الله ونعم الوكيل. (شخرة) سيف ايه يا ولاد الشرموطة!؟ (ثم بابتسامة)، احم، ماتزعليش مني يا ست كاميليا. الواحد مش متمالك اعصابه م اللي بيشوفه والله، والفضائيات والفيديوكليب والإنترنت بتساهم في تغييب جيل الشباب دلوقت .

والله العظيم انا زعلان علشانك يا أبلة، يرضي مين دا يا اخواتي أم تتحرم من ضناها بس؟ ف شرع مين؟ لكن ارجع واقولك يمكن ربنا يكون مقدر لعيالك يتربوا ف بيت إسلامي صحيح علشان يشوفوا بعنيهم سماحة الإسلام. وبعدين يعني فيه كلمة بصراحة حارقاني وعاوز اقولها وابقى بنافقك لو ماقلتهاش: يعني لما الاولاد يكتبوا ف ورق الامتحان انا مسيحي دا يعني ايه؟ يعني مستكبرين يعني يبقوا مسلمين!؟ ولا مفتخرين يعني بموضوع المسيحي دا !؟ والنبي خلي الواحد ساكت يا ست كاميليا دا البني ادم مننا معبي م اللي بيشوفه. وابقي علميهم ان دين الاسلام دا احسن دين، وانه حبيبي وحبيبك رسول الله دا خاتم الانبياء والرسل والبشر أجمعين.

وبعدين يعني (بغمزة) سيبك من كلام الستات دا والراجل اتجوز ولا ماتجوزش، ياباي، هئ هئ، على غيرة النسوان!! الراجل عندنا ف الاسلام من حقه طالما بيعدل ما بين ستاته يجوز مثنى وثلاث ورباع، ليه بقى؟ لإن الرجال دول قوامون على النساء، شفتي الرحمة اللي ف دين الاسلام؟ ولا اقولك عاللي احسن من دا ومن دا، لنفرض يعني، يعني مثلا، إنك أعلنتي إسلامك بكرة الصبح، حد هيبقى له عندك كلمة؟ مش انتي متخانقة مع الراجل عشان هو مسلم وانتي مسيحية. طب ما تعلني اسلامك. دا الاسلام دا دين جميل. بس جربيه انتي. وساعتها ولا حد هياخد عيل من عيالك، ولا حد هيمشي كلمة عليكي، باستثناء طبعا جوزك وابوكي واخوكي الكبير وابنك لما يكبر وشيخ الجامع وأولي الأمر وباقي الرجالة. بصي. انا مش عاوزك تردي دلوقتي. خدي وقتك وفكري فيها. عندك مصحف ولا اجيب لك المصحف بتاعي؟ دا الإسلام دا دين جميل واللهي.


25 comments:

Anonymous said...

حلو قوي..لا يا سيدي
الاسلام مش دين جميل
وانت مش مؤتمن علي ابنك المسيحي عشان هتغير دينة
وانت مش مسيحي انت مسلم
ووريني نسخة ىمن الانجيل الصحيح مش المحرف اللي عندك لو سمحت نفسي اشوفها بعد اذنك واقارنها
والمسيح مقالش ابشركم بنبي من بعدي اسمة احمد او محمد
والاسلام دين مش عقلاني
سؤال واحد بس قبل ما تكتب الخرابيط بتاعتك في البوست دة بالذمة هل انت مقتنع بالكلام دة ولا اي بطيخ في البتنجان ومزنوق في كلمتين بتكتبهم وخلاص ..عزيزي يؤسفني اني اقولك ان اساسا نص كلامك غلط ولو عيل مسيحي شاف الكلام دة هيموت علي روحة من الضحك علي شوية التفاهات والمغالطات اللي موجودة في الاول يا جدعان يا ناس يا هو والله ربنا ادانا العقل دة عشان نفكر بية مش عشان نعمل بية ملوخية ولما يبقي كلامك مبني علي غلط يبقي كلة غلط..

Anonymous said...

حسبى الله ونعم الوكيل
اتق الله واحسبها كويس النهاردة انت ماشى على رجليك بكرة الله تكون حالتك ازاى
لا تسخر من الاسلام ولا تتطاول واتق الله ويا اخى عمر عذاب النار الذى ذكرته سابقا هو نوع من الملل او حتى التنعم بالجنة
دع عنك هذا الجدل واستهدى بالله وخليك فى قصصك ورواياتك ناطح فيهم كيفما شئت
مش برضه اسمه ابداع
احمد عبد الله

ألِف said...

بدأت أقتنع أن الناس دي مصرة تبقى أغبياء

mary victor said...

يا انونيموس دة اسلوب نائل الطوخى فى الضوحك
ماتتحمقش كدة و ماتخدوش جد
شكلك زبون جديد هنا
بوست ظريف اوى يا نائل :)

سيزيف مصري said...

عزيزي نائل
معاك حق طبعاً في كل الكلام ده. بس مش كفاية إنها تعلن إسلامها وتقول الشهادتين زي ما غنت قلت. إنت عارف القضاء عندنا مؤسسة عظيمة ومحنكة، وماحدش يعرف يضحك عليها. لازم تتحط طبعاً تحت المراقبة - بتروح تصلي فين وكام مرة في اليوم وايه أخبار الحجاب واللذي منه. وبعد لما تجيب شهود "عدول ثقاة" (يعني مسلمين لا غبار علي التزامهم) بإنها مسلمة وحسن إسلامها، ممكن القضاء يحكم لها ويرجع لها ولادها، لأنها في الحالة دي هتبقي زيها زيه - الزوج يعني -و ممكن وقتها نتكلم في الحضانة الأحسن والظروف الأفضل وهكذا. لكن فيه نقطة مهمة، وهي شبهة الإسلام بحد السيفن يعني إنها عملت ده بضغط من الحكم ده وسحب ولادها منها ولّا حاجة، ودي حتة فنية. لازم تعترف بإنها وهي صغيرة كانت بتفكر في لاموضوع ده وعندها مشاكل مع الحاجات الغير منطقية أو الغير أخلاقية في الكتاب المقدس، وإن من حكمة ربنا ونعمة عليها، إن تحصل الحادثة دي بعد كل السنين دي، وترمي لها نور يعمي عينينها عن طريق الضلال ويضيء لها طريق الهداية - سبحان الله بعد كل السنين دي! وكفاية تطلع في لابيت بيتك أو في إقرأ أو مع حد نم الدعاة "الثقاة" برضة، ووالله العظيم ما حدش هيقدر يحرمها من ولادها، المشكلة إن الناس مش فاهمة الدين الصحيح
مش كده برضة؟

Anonymous said...

انا طلعت زبون..اشطة

هبة ربيع said...

ردا على نداء ( الكنيسة أولى بماريو وأندور ) وتدوينتك الشنيعة دي ، اقترح أن الطفلين لا ياخدهم الأب ولا الأم ، يعني لا الجامع و لا الكنيسة ، الطفلين تاخدهم الدولة وتربيهم بمعرفتها لغاية ما يبلغوا ويقرروا يحبوا يكونوا تبع أي ملة ، لكن المشكلة في السيناريو ده أن الدولة دينها الرسمي الإسلام - زي ما بتقول نصوص الدستور - يعني حتى الدولة اللي مطلعة دينا لها دين ، طب فيها أيه لو الدولة تمنع قيد الديانة للمواليد ، ولما البني أدم يكبر ويقتنع بملة يروح يسجل نفسه تبع الدين ده ، ونبقى كلنا في المدرسة ( فترة التعليم الأساسي ) بشرطة وبندرس حاجة اسمها ( الاخلاق الحميدة ) بدل حصة الدين ، مش برضو فكرة كويسة ؟!! ، وتحل مشكلة امتحان الدين بتاعة ماريو واندرو ، يا خوفي بقى من السيناريو القذر بتاع أنتوا أخدتوا وفاء هناخد أدامها العيلين ، أيه رأيك ؟!! ، الواحد لما بيفكر شويه يا نائل في الحاجات دي دماغه بتشط
اللهم لا تؤاخذنا بما فعله السفهاء منا

bluestone said...

الله يخرب بيتك ضحكتني في يوم حالك السواد :))
كله الا العدل
ونزاهة القضاء المصري المعروفة من ايام ازمة نادي القضاة يا راجل

القضاء العادل النزيهة ابن النزيهة..
كل ماهنالك يا نائل يا ظالم
ان القاضي اخذته الشفقة والرحمة بالاولاد
يعني هم قعدوا اكتر من 12 سنة في الضلال طيب ما يجربوا الهداية شوية

وياسلام لو ربنا جعله سبب في هدايتهم

اما انت عجيب قوي

هو القاضي ده مش مؤمن ؟؟
والمؤمن لازم يغير المنكر بايده ان قدر

هو انت مش مؤمن ولا ايه؟

Anonymous said...

أنا كمسلم، راجل بؤمن باليهودية والمسيحية والإسلام، بينما حضرتك كمسيحية بتؤمني بالمسيحية واليهودية بس، صح كدا؟ يعني أنا في الإسلام عندي حتة جامدة بتقول: "لا نفرق بين أحد من
رسله
==================
هذا نموذج جيد للغاية لأسلوب المتطرف الاسلامي في الحديث عندما يدعي السماحة و هو لا يقول الا كل قباحة
اعتقد انك هذة المرة لم تكن تسخر ابدا

nael eltoukhy said...

هيهيهيههييييي

شفت بقى!؟


قل لهم بقى يا عم والنبي

أنا متطرف، شرس، وحش فظيع، لا أرحم أعدائي

هع هع هععععععععععع

أحمد جمال said...

إحنا نأخذ من كل رجلون قبيلااااااااااااة ..

حسبي الله ونعم الوكيل فيك يا نائل .. أسأل الله أن يهديك .. حسبي الله ..

أحمد جمال said...

نسيت أقول عليك لعنة الرب .. وكمان أنت عار على الإسلام .. فاضل إيه .. فاضل إيه .. آة .. أسأل الله أن يهديك .. أسأل الله أن يهديك ..

ماذا حدث للمصريين صحيح ؟

Anonymous said...

يا استاذ الف اذا كنت شايف ان الناس عندنا مصرة على الغباء فانا اراك مازلت مصر على الجهل واذا كنا نائل بيضوحك معاكم ومع نفسه شويه
نصيحة يا راشدين يا عاقلين بلاش اللعب والسخافة فى منطقة الدين
مش كدة ولا ايه

أسماء علي said...

بص يابرنس نائل

بعيد عن العرض المريع في بوستك ومريع معناها انه لطيف المعشر

أنا شايفة أولا إن مصر المفروض إنها دولة مدنية ومفيش دولة مدنية بيبقى الحكم ف الشريعة إلا ف الأحوال الشخصية ده مبدئيا عشان شلل الدولة بتاعتنا بس ف الأول اللي بيقولوا إنها مدنية ودين الدولة الأساسي الإسلام

ثانيا أنا شايفة إن الأم أي كانت ديانتها تربي ولادها لسن الحضانة القانوني ماهو ولادها مهما حصل

و لا اشمعنى لما بتكون الأم مسيحية أمريكية ولا أوربية بنقول تاخد ولادها و لو مصرية نقول استنوااااااااا دي مش مسلمة
!!!!!!

هتقولي أصل المسيحين ف مواقعهم بدأوا بالهجوم ومش عارف ايه .. ماهو لا ننكر إن التعصب شغال من الناحيتين آخر حلاوة

صباحك جزر يا نائل

بنت القمر said...

الاستاذ نائل
===================

ولا حد هيمشي كلمة عليكي، باستثناء طبعا جوزك وابوكي واخوكي الكبير وابنك لما يكبر وشيخ الجامع وأولي الأمر وباقي الرجالة
=======================
ده علي لي اساس ان الست المسيحيه تنعم لكونها مسيحيه بكافه حقوق الانسان
هيهيهيهي
يا اما انت متعرفش مسيحييات يا اما انت مش من البلد دي
بامارة ايه المسيحيه ابوها وجوزها مش بيدعكوا بوزها في الارض بصورة ما..
وبامارة ايه ومين قالك انها مش بتخضع لباقي السلسله الذكوريه بصورة ما بس شيل الشيخ وحط ابونا
بامارة ايه
ممكن احكي الف حكايه عن المسيحييات اللواتي يعنين من تحكم الزوج والحرمان من العمل او التعليم او السفر
او ابقاءها في زواج كريه وخلعان الزوج الي عشيقه اخري
مع تسلط ابونا في ابقاءها في ذلك الزواج
احنا عندنا معاناه وهم كمان
المشكله مش في الدين يا استاذ نائل المشكله في العقليه الذكوريه المتسلطه
للراجل المسلم والمسيحي علي حد سواء
العقليه الذكوريه هي اللي ورا حكم اندرو وماريو
مش العقليه الاسلاميه
العقليه اللي بتنتصر للذكر الاخر تحت اي حجه
مش عاوزة اناقش الحكم
لكن صانع القانون ذكر والقاضي ذكر
الخصم ذكر يبقا الحكم ها يبقا منصف لمين للانثي
خليهم سايقين البلد في كل حاجه لما تخرب!!

bluestone said...

يا بنت القمر :
مفيش حد قال ان الست المسيحية بتنعم بكل حقوقها

بس في النهاية في حاجات بتبقى خاضعة لتسلط الزوج والاب والاخ

انما المنع من السفر مثلا وقضايا الضم والاولاد وحرمانها من حقوقها ده راجع لحكم الشريعة او ما يطبق منها

أما بالنوسبة لابونا فمفيش ابونا بيتسلط لابقاء ست في اي زواج
لان اصلا مفيش طلاق الا لاسباب محددة
يعني الست والراجل في الحالة دي مدبسين في الجوازة

يمكن اللي بيضغط على اي ست تبقى في زواج كريه (سواء مسيحية او مسلمة) هي ضغوط الاهل والمجتمع .. لان وصم اي ست بانها مطلقة ده عار لا يمكن تحتمله اي ست بسبب المجتمع المحيط

نائل مكانش بيتكلم عن المرأة بشكل خاص على فكرة

والحكم يا بنت القمر مالوش دعوة بان ام اندرو وماريو ست وابوهم راجل

لأ

القضية كلها مكانش فيها اي نقاش عن صلاحية اي من الطرفين للضم .. وانما كل مجريات القضية كانت عن إثبات ان الاب مسلم
وكأن مجرد اثبات اسلامه صلاحية مباشرة لاهليته لحضانة الاطفال

bluestone said...

يا هبة:
يعني الحل الجميل اللي اخترتيه بصراحة عجيب جدا .. لا دول ياخدوهم ولا دول

يعني حل سياسي والاولاد يروحوا الاحداث عشان محدش يزعل ؟؟؟

الكنيسة اولى بيهم ببساطة لانهم مش مسلمين مفيش تطرف في المسألة ..
لو انتي عايشة في ماليزيا لكنك مصرية والحكومةالماليزية عايزة تديكي الجنسية وانتي بتقولي لأ انا مش عايزة انا مصرية يا جماعة

والحكومة المصرية بتقول طالما انتي مصرية وعايزة تبقي مصرية يبقى احنا اولى بيكي من ماليزيا .. يبقى الحكومة متطرفة؟؟؟

ده مثال مختلف بس القياس متشابه إلى حد ما !!!!

الحل بتاعك حل سياسي عام
مع ان المشكلة فردية جدا

بنت القمر said...

بلو الحبيبه
===============
يا بنت القمر :
مفيش حد قال ان الست المسيحية بتنعم بكل حقوقها
-----------------
مش انتي_ الاقتباس اللي خدته هو اللي قال
لو اسلمتي محدش ها يتحكم فيكي الا الاب والاخ..,و..و....
يعني لو مش مسلمه محدش ها يتحكم فيها؟؟!!!
------------------
بس في النهاية في حاجات بتبقى خاضعة لتسلط الزوج والاب والاخ
------------------
ما هو ده اللي بقوله
متفقين يعني
-----------------
انما المنع من السفر مثلا وقضايا الضم والاولاد وحرمانها من حقوقها ده راجع لحكم الشريعة او ما يطبق منها
--------------------
ليه هو التحكم وانتقاص الحقوق والاستبداد موجود فقط لارتباط القوانين بالشريعه!!!
مشفتيش زوج مسيحي بيمنع مراته تزور اهلها عشان متخانق مع اخوها مثلا
انا لي صديقه عندها 32 سنه بعد الجواز اجبرها جوزها انها تمنع الحمل لانه مش مستظرف فكره انه يبقا اب!!! وانتهي الامر بيها الي الرجوع لبيت اهلها بعد ان فشل ابونا واهلها واهله في تغيير موقفه
وبقا لها تلات سنين وداخلين علي الرابعه منتظره اقامه الحصول علي طلااق,,, لتتخلص من زواج فاشل
يبقا مش كل المشاكل الزوجيه بين المسيحيين
وطرق الاستبداد سببها استغلال الزوج لاحكام الشريعه الاسلاميه
---------------------
أما بالنوسبة لابونا فمفيش ابونا بيتسلط لابقاء ست في اي زواج
لان اصلا مفيش طلاق الا لاسباب محددة
يعني الست والراجل في الحالة دي مدبسين في الجوازة
-----------------
ما هو ده سوء استغلال النص
وتفسيره
لانه زي ما تناقشنا قبل كده انه في عشر اسباب للطلاق
اختصرها رجل الدين الذكر حسب رؤيته وهواه في سبييبن بس والنتيجه كوارث اجتماعيه
-----------------
يمكن اللي بيضغط على اي ست تبقى في زواج كريه (سواء مسيحية او مسلمة) هي ضغوط الاهل والمجتمع .. لان وصم اي ست بانها مطلقة ده عار لا يمكن تحتمله اي ست بسبب المجتمع المحيط
-------------------
المجتمع رجل بينظر لها ويقولب المطلقه انها كيان منقوص ومنتهك وبالتالي بيلفظه
---------------
نائل مكانش بيتكلم عن المرأة بشكل خاص على فكرة
----------------
عارفه انه مش عن المرأه لكن عن مرأه وقضيه مرأه في الاخر
-----------

والحكم يا بنت القمر مالوش دعوة بان ام اندرو وماريو ست وابوهم راجل
لأ
القضية كلها مكانش فيها اي نقاش عن صلاحية اي من الطرفين للضم .. وانما كل مجريات القضية كانت عن إثبات ان الاب مسلم
وكأن مجرد اثبات اسلامه صلاحية مباشرة لاهليته لحضانة الاطفال
-------------------
انتي شايفه كده
انا مش شايفه كده خالص
انا شايفه انه الخصم والحكم رجل واضع القانون رجل
عشان كده بيشوف الرجل كائن كامل الاهليه
لانه رجل
مش لانه مسلم
في عقله الباطن
في حديث بيقول
كل مولود يولد علي الفطرة فأبواه يسلمانه او ينصرانه او يهودانه او يمجسانه
ابواه بصيغه المثني تعني ابواااه
مش ابوه
نرجع تاني
لقضيه استغلال النص وتطويعه حسب هوي المشرع
ولو الست المسيحيه عندها تمتع بحقوق اكتر من المسلمه يا ستي انا مستعده اغير من الصبح:)))
بس

karakib said...

نائل
شكرا :))) انت قلت كل حاجة ممكن تتقال كدة

nael eltoukhy said...

يا بنت القمر

أولا فعلا مفيش حد قال ان الست المسيحية ماحدش بيتحكم فيها.. ارجعي للكلام المكتوب وهتلاقي ان مفيش حاجة اتقالت بالمعنى دا.. والجملة اللي انتي اقتبستيها بتحيل للمرأة بشكل عام، بداية الكلام ان لو هي بقت مسلمة ماحدش هيتحكم فيها - ودا معناه ان وهي مسيحية الناس كانت بتتحكم فيها، علشان هي مسيحية، وعلشان هي ست - باستثناء فلان وفلان وفلان وفلان، ومافيش اي اشارة الى ان دول ماكانوش بيتحكموا فيها وهي مسيحية، دي اول نقطة يعني
دايما فيه خطاب اسلامي - بينتمي ف الغالب للاخوان المسلمين مش لاي جماعة اسلامية تانية - بيرد على نقطة ان الاقباط مضطهدين قائلا: الشعب المصري كله مضطهد.
أيوة يا معلم. المصريين كلهم مضطهدين من السلطة لانهم شعب، لانهم مش سلطة، والمسيحيين فوق كدا مضطهدين زيادة لانهم مسيحيين، مش على دين السلطة، وفوق كدا لانهم من الشعب، لكن كمان مش على دين الشعب/ الاغلبية. شفتي الزنقة؟ والست المسيحية فوق كدا مضطهدة اكتر، لانها ست، ولانها مسيحية، ولانها من الشعب، وهكذا وهكذا وهكذا، وبيتهيألي كدا انا ممكن اوصل للنقطة اللي انا عاوز ارد عليكي بيها
يمكن يكون فيه عقلية ذكورية في الحكم على كاميليا زي ما قلتي، لكن حضرتك بتقولي انها في العقل الباطن، والعقل الباطن كان محتاج منك جهد اكبرعلشان تبرزيه، يعني انك تستشهدي بكلام القاضي، بنص الحكم، بكلام الادعاء، علشان تبيني ان المتهم الحقيقي في القضية كان المرأة مش الشخص المسيحي. لان ظاهر القضية كله ان الكلام عن المسيحي مش المرأة، فحضرتك جبتي نظرية بديلة ومافيش اي اثبات عليها.
طبعا ماحدش بينكر ان فيه عقلية ذكورية بتتحكم في كل حاجة في البلد، ويمكن اوي من بينها القضية دي، لكن ظاهر القضية كلها ان الكلام عن اسلام الراجل، لاحظي ان قانون الحضانة نفسه اتغير بسبب حالة تحول الرجل الى الاسلام، فبقى سن الحضانة سبع سنين مش خمستاشر سنة، لان سبع سنين هي السن اللي الطفل يقدر يميز فيها بين الاديان، كما قيل، يعني القانون ماشي على كل ستات مصر بشكل ومشي في القضية دي بشكل تاني علشان احد الطرفين مسلم واحدهما مسيحي.
انا عن نفسي، مش مستبعد ابدا يكون فيه اثر لعقلية ذكورية في القضية دي، لكن الاساس ان الست مسيحية، إنها تبقي مسيحية وكمان ست، الله!! ما اجمل الفريسة إذن. كدا يعني.
بعد كدا.. كلامك عن عدم الطلاق عند المسيحيين وكونه ظلما موجها ضد المرأة المسيحية. انا مافهمتش دا. افهم ان عدم الطلاق دا حاجة موجهة ضد كل من طرفي العلاقة (هما الاتنين مدبسين في الجوازة.. بلغة بلو ستون)، لان زي ما هو مش من حق الست في المسيحية انها تطلب الطلاق فمش من حق الراجل انه يطلق، وبالتالي دا مالوش اي علاقة باضطهاد المرأة، دا له علاقة باضطهاد الارادة الحرة للزوجين انهم يفضلوا مع بعض او لا، دا تشريع ضد الحرية بشكل عام ومش ضد حرية المرأة، يعني هنا، كلامك عن المرأة غير ذي صلة.

كلامك عن التحكم الذكوري في المرأة المسيحية والمسلمة على حد سواء.. موافقك عليه تماما، تمام، في بلدنا، ويمكن في بلاد تانية كتيرة باختلاف المسميات، فيه تحكمات واضطهادات مختلفة، الذكر بيتحكم في الانثى، المسلم بيتحكم في المسيحي، الغني بيتحكم في الفقير، المتعلم بيتحكم في الجاهل. ودا طبعا مينفيش ان فيه طرق مناورة، يعني في شركة مثلا أصحابها والشغالين فيها مسيحيين، لما يبقى فيه مسلم ف وسطهم اكيد هيتحكموا فيه او هيضطهدوه او هيميزوا ضده. أما ف البلد بشكل عام، في الشارع المصري بشكل عام، فلأن المشهد العام فيه اسلامي فهتلاقي التمييز الاكبر ضد المسيحيين. زماااااااان، أيام كنت أعمى والآن أبصر، كنت كاتب حاجة عن الموضوع دا، عن ازاي الصوت الاسلامي بقى هو الصوت البديهي في الشارع في مقابل الصوت المسيحي.
http://www.ahewar.org/debat/show.art.asp?aid=50108

هبة ربيع said...

العزيزة الخرزة الزرقاء أو بلو ستون ، ما اقترحته لم يكن حلا ، وإلا اسمحي لي ان أعرف رأيك في باقي الحلول ( ناخد العيلين قصاد وفاء قسطنين والحل بتاع الشرطة ) ، لم تكن حلول إنما تهريج ونأوزة على طريقة نائل ، المشكلة ليست في حضانة الولدين لكن في تبعية الديانة ، للأب أم للأم ، وحلها في رأيي - وده الكلام اللي بجد مش هزار - أن الدولة تدافع عن حرية العقيدة بجد ، يعني اللي عايز يسلم أو يتنصر براحته ، لا تدخل من الكنيسة أو الأزهر ، فالمفترض أن ضم الأب للولدين لا يعني أنه سيكرههم على الإسلام ، المشكلة في الحكم وفي الحيثيات ظهرت كما لو كان القاضي بيختار ديانة للولدين ، مش بيختار لهم ظروف مناسبة للحياة !! ، وفي مواجهة حكم القاضي ظهر شعار (الكنيسة أولى ) وكأننا فعلا بنختار دين !! ، وبعدين نفترض أن الست كاميليا احتفظت بولديها حتى الخامسة عشر كما ينص القانون ثم انتقلوا لحضانة أبيهم فهل هذا ضمانة أنه لا يكرههم على الإسلام ، لو كانت الحكاية مجرد تبعية دين ؟! ، طب بلاش نفترض أن الست كاميلي ربنا يديها طولة العمر اتوفت معنى كده أن الأولاد يتنقلوا لحضانة الجد أو الخال - لمجرد أنهم مسيحيين - بدلا من حضانة الأب ؟!! ، رأيي في قضية ماريو وأندرو أنها دعوة حضانة ويجب أن تظل كذلك ، علينا المطالبة بحرية العقيدة لايا كان من يكون

هبة ربيع said...

معذرة على الخطأ الشنيع القضية (دعوى ضم ) وليس دعوة ضم
:)

Anonymous said...

المسألة أبسط من كده بكتير, اندرو وماربو يسكنوا في الدويقة, هي البلد ناقصة خلفه؟ و توأم كمان يا مفترية ؟بس هنا فيه سؤال : اندرو وماريو
(بالذمة دي أسامي حيبقوا شهدا ولا لأ

بارودي said...

!! خخخخ

Unknown said...

ازاي توقع اي شركه تدريب كبيره وتخليها تفقد كل مصداقيتها امام عملائها:
1- تكتب تحذير منها بالباطل بطريقه مقنعه وتنشره على الانترنت وتحرض الناس انها تشيره هتلاقي كل الناس بتعمله شير في كل مكان.
2- تقول انها مش بتسلم الشهادات للخريجين والاقوى انك تقول انها بتسلم شهادات مزوره وان في ناس انفصلت من شغلها بسبب شهاداتها او اتسجنت وساعتها الناس هتترعب من التعامل مع الشركه ولو ليهم شهاده مش هيفكروا يستلموها.
3- تشكك في المحاضرين وتقول انهم مش ذوي كفائه تؤهلهم للتدريس.
4- تطلع اشاعه ان جامعة القاهره بنفسها بتحذر منها وساعتها محدش هيشكك في جامعة القاهره وكل الناس اللي اتخرجوا هيفتكروا انهم اتنصب عليهم.
5- تعمل اكونتات وهميه على الفيس بوك كأنهم متدربين اتعاملوا مع الشركه وتخليهم يخشوا يشتموا الشركه.
6- تعمل صفحه على الفيس بوك هدفها الاول التحذير من الشركه وتعملها دعايه مدفوعه والفيس بوك هيقوم بالواجب.
كل ده وأكتر حصل مع شركة اس بي سي للتدريب الطبي ولسه مكملين لو احنا فعلا زي مابيقولوا ليه لحد دلوقتي لم يتخذوا ضدنا اي اجراءات قانونيه ليه لسه شغالين ولسه لينا مصداقيه ليه مازلنا الاختيار الاول لاي طبيب حابب يطور من نفسه.
وده كان الرد المحترم لشركه اس بي سي عليهم:
بسم الله الرحمن الرحيم
"يَا أَيُّهَا الَّذِينَ آمَنُوا إِنْ جَاءَكُمْ فَاسِقٌ بِنَبَإٍ فَتَبَيَّنُوا أَنْ تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ"
نظرا للهجوم المتتالي على شركتنا والذي يعكس نجاح الشركه التي حققته في مجال التدريب الطبي وجب علينا توضيح التشابك وسوء الفهم القائم احتراما منا لعملائنا والتوضيح كالتالي :-
اولا: كل الاطباء الذين اجتازوا اختباراتهم بنجاح قد حصلوا على شهاداتهم موثقه ومعتمده.
ثانيا: لم ولن تقوم الشركه بتسليم اي دارس اي شهاده غير سليمه والشركه تؤكد وتشدد أنها ستتخذ كافة الإجراءات القانونية ضد من سولت له نفسه رمي مؤسسة SPC للتدريب بالتزوير وسيكون لزاما عليه إثبات عدم صحة الإعتماد الممنوح للشركه.
ثالثا: لم ولن تقوم الشركه بالدعايا باسم طب اسنان جامعة القاهره حيث ان مركز التعليم المستمر هناك يقوم بتنظيم دوراته بنفسه دون الاستعانه باي شركات او مؤسسات خارجيه.
رابعا: شركة اس بي سي هي شركه مساهمه مصريه مشهره برقم 62119 لسنة 2011 وهي ليست شركة أفراد أو شركه ذات مسؤوليه محدوده وأن جميع العاملين بالشركه هم مجرد موظفين إداريين معينين من قبل مجلس إدارة الشركه يقومون بأعمالهم الإداريه فقط لاغير.
خامسا: جميع المحاضرين لدينا هم من افضل الاساتذة والمدرسين في الجامعات المصريه المختلفه وجميعهم مؤهلون لذلك كما ان اغلب محاضراتنا المسجله يتم بثها على القناه الخاصه بالشركه على اليوتيوب
https://www.youtube.com/channel/UCi3FYrop-yoDt9Iog0PqnpA
سادسا: والشركه تهيب بالسادة الأطباء عدم الإلتفات لهذة المحاولات الرخيصة للنيل من سمعة الذين يبذلون أقصي مجهوداتهم لتوفير أحسن مستوي ممكن من التدريب الطبي وتؤكد الشركه أنها تضع كافة إمكاناتها في خدمة زملائنا الأطباء والصيادلة وأنها تتفرغ فقط لعملها وتسابق الزمن لتضع الأطباء العرب في وضعهم العالمي اللائق بهم ولا تهاجم أحدا لأنها تسخر كافة مجهوداتها للبناء والشركه تؤكد رفضها التام والجازم لهذا المستوي الرخيص والمبتذل من التنافس.
سابعا: نرحب بأي إستفسار أو تساؤل من خلال:
صفحتنا على الفيس بوك https://www.facebook.com/SPC.EG
او الموقع الخاص بنا www.SPC-eg.com
او ايميل الشركه info@SPC-eg.com
وكل عام وأنتم بخير والله الموفق والمستعان