Friday, August 29, 2008

زعلان ليه مني يا زميلي؟


انا عاوز اتكلم معاكو النهاردة عن ظاهرة بتدمر حياتنا دلوقتي. انتو أكيد ملاحظين كم التوتر اللي بقى يحيط كل مظاهر حياتنا، ملاحظين مظاهر التنشنة في الشارع وف الشغل وف البيت, مين دلوقتي يقدر يقعد زي زمان يستمتع بأغنية حلوة. لوحة فنية جميلة. كتاب فيه معلومات مفيدة؟ ماحدش. ودا بسبب موضوع حلقتنا النهاردة. الزعل.

فيه مشاهدة بعتت لي من اسبوع تحكيلي عن مشكلتها. قالت انها اتخانقت مع جوزها علشان هو بيطفي السجاير على الأرض برغم أنها اشترت له طفاية ف كل أودة ف الشقة. الحقيقة سائر الأحداث كان مؤسف جدا. بسبب دا حصل بينهم، أنا أسف، ديفورس، والولدين اتحكم عليهم أن كل واحد يعيش ف بيت. في الحقيقة ماتتصوروش الموضوع دا أثر فيا قد إيه. كنت بسوق العربية وانا بفكر ف الموضوع دا.. والحقيقة كنت بفتكر مشكلة حصلت في حياتي أنا من كام شهر، لما اضطريت اطلق مراتي اللي انا بحبها علشان خناقة تافهة، من وقتها، ولغاية دلوقتي، وانا ندمان جدا.

***

الحقيقة إن احنا مبقاش يعدي يوم من غير ما نسمع عن منتج زعلان مع مغني، وبلد زعلانة مع بلد تانية، وأديب شاب زعلان مع أديب شاب تاني، ملاحظين؟ هه؟ انا كررت كلمة زعل في جملة واحد قد ايه؟ مالاحظتوش. طب ياللا نعيد تاني، وعدّوا معايا. أديب شاب زعلان مع أديب شاب تاني، ومنتج زعلان مع مغني، وبلد زعلانة مع بلد تانية. يعني تلات مرات قلنا كلمة زعل ف جملة واحدة. دا بيدل على إيه في رأيكو؟ على إن الزعل هو محور حياتنا دلوقتي.

انا عاوز أتكلم معاكو عن بعض النظريات اللي طلعها علماء غربيين بخصوص الزعل، العالم هنري ماكس مثلا بيتكلم ان الزعل بيزود إفرازات الغدد اللمفاوية وهي بتنقل نشاطها الى خلايا الشعر وبتضعفها مما يصيب بالصلع، اما العالم جورج ميشيل فبيأكد إن الزعل بيضعف القدرة الإنجابية للرجل، وبيختتم كتابه "عالم بلا زعل" بجملة مؤثرة جدا بيقول فيها: إن عالما من الزعلانين لن يقدر له الاستمرار حيث سوف تضعف قدراته الإنجابية إلى درجة العقم الكامل. طبعا فيه مؤتمر كبير حضره العالمين دول وواجههم شخص باكستاني مسلم بالآية القرآنية اللي بتقول: "ولا تهنوا ولا تحزنوا" مما يدل على إن العرب من ألف وربعمية سنة وهما عارفين إن الزعل مش كويس علشان البني ادم، العالمين الغربيين دول أعلنوا إسلامهم طبعا بمجرد ما سمعوا الآية القرآنية الكريمة. نسيت أقول إن العالم جلاوديوس فايبر طلع بنتيجة علمية مهمة بيؤكد فيها إن مش لازم البني آدم يزعل لأن مفيش حاجة ف الدنيا تستاهل.

***

طبعا فيه تفسيرات كتير للموضوع دا. يعني مثلا جلاوديوس بيقول إن الضغوط بتاعة الحياة اليومية هي اللي مخلية محدش طايق نفسه. أما إنريك روجر فبيقول إن الناس قلوبها مابقتش صافية لبعض زي الأول. هاهاها. طب إيه رأيكوا، وانا بركن عربيتي ديك النهار قام السايس قال لي كلمة جميلة اوي. تحبوا تسمعوها؟ قال لي: الشيطان دخل بين الناس خلاص ومش عاوز يطلع. انا قعدت افكر كتير إيه ياترى معنى الجملة دي. إيه معنى إن الشيطان دخل بين الناس. اقول لكو. يعني إنت دلوقتي زعلان مع مراتك. ومراتك زعلانة مع أختها، وهكذا، لغاية ما يوصل الموضوع لرئيس دولة يزعل مع رئيس دولة تاني، وتحصل الحروب. شفتوا الموضوع بسيط ازاي. وشفتوا ان معظم النار من مستصغر الشرار. أنا قعدت افكر إن ازاي الراجل البسيط دا، اللي هو السايس، قدر يوصل للحكمة العميقة دي؟ ودا راجل لا معاه دكتوراه من السوربون ولا معاه جايزة نوبل ولا حاجة. منين قدر يعرف إن الشيطان فعلا دخل بين الناس ومش عاوز يطلع؟ سبحان الله فعلا.

في نهاية الحلقة، أنا بقترح حملة كبيرة. يعني طبعا كل واحد يقدر يشارك فيها باللي يقدر عليه. مش عاوزين نجبر أي حد على حاجة مش عاوزها. وبقترح عنوان للحملة يكون مثلا: (إنت زعلان ليه مني يا زميلي "محاولة لرأب الصدع"). ياريت تبعتولنا اقتراحاتكوا على إيميل البرنامج

12 comments:

Ahmed Shafie said...

تحروا الدقة أرجوكم
أولا جلاةديوس راجل بتاع أنثروبوجيا، ودارويني من عتاة الداروينية، وقال إن فيه قردين واحد خلا التاني نايم وكل جوزة الهند بتاعته أم التاني خد على خاطره، قام تطور وبقى إنسان، الأولاني شافه بيتطور قعد ييييدحك ولسه بيتنطط م الفرحة لحد دلوقت. يعني المسألة مش مسألة ضغوط يومية ولا حاجة، الإنسان إنسان لإنه أخد على خاطره، يعني زعل، لذلك أنا أرفض الانضمام للحملة تماما، وهالغي اشتراكي في القناة بتاعتكو كمان، ودا يؤكد إني زعلان

جبهة التهييس الشعبية said...

الدنيا اصلها حر شوية

M@RV3L said...

انا زعلان منكوا عشان مجبتوش سيرة كتاب لا تزعل في حلقة النهاردة

:(

emoo said...

اعتقد اننا نحتاج الى التسامح
الجميع يخطأ بما فيهم نحن
لماذا لا نسامح
في بعض الاوقات نتنظر الاعتذار شرطا للمسامحة
الاعتذار لا يقلل من الكرامة ..عندما تعتذر تكون على قدر كبير من الشجاعة لانك اعترفت بخطأك في حق من اسأت اليه
وحتى وان كانت الاساءة كبيرة وكسرت اشياء بداخلنا ..نستطيع ان نخبرهم ان الامر انتهى ..والوقت كفيل بحل ما بداخلنا
الكره والخصام ليس عقابا للشخص المسيء ..المشاعر السيئة تحرق صاحبها

nael said...

فعلا يا إيمو. وأحب أن أذكرك بقول المطربة لطيفة عندما قالت
على إيه ناخدها حكاية كرامة.. ما دمنا حبايب كفاية ابتسامة

وأنا أعتقد أن هناك مخططا ضخما يريد تشويه جميع المشاعر الإنسانية النبيلة والقيم الجميلة عند الناس، ومن هذه القيم قيمة الاعتذار مع أن الاعتذار بالحق لا يفسد للود قضية

Abdou Basha said...

انا بس عايز اقول لحضرتك كل سنة وانت طيب بمناسبة الشهر الكريم
ويارب يعيده علينا بالخير وعلى الأمة الاسلامية جميعا يا رب
وياريت نخلي الشهر الفضيل ده فرصة نطهر بيها قلوبنا من الخصام والزعل
وياسلام لو كل واحد يرفع سماعة التلفون يتصل بزميله اللي كان زعلان منه، أو يكلم مامته اللي بقاله مدة مش بيطمن عليها
ومن غير ما اطول عليكم، عندي طلب يا ريت تستضيفوا يسرا في البرنامج

بنت القمر said...

هي المذيعة دي مرات رضا...؟؟
ولا بنت خالته؟؟

nael said...

شافعي
أيوة بس ربنا سبحانه وتعالى وهو اللي احسن مني ومنك بيقول عن الانسان انه كان ظلوما جهولا، ومعنى كدا ان الانسان بقى انسان، يعني بقى ظلوما جهولا، لانه كان زعلان، ودا بيأكد المعلومة اللي مش كتير من الناس عارفينها وهي ان الزعل حاجة مش كويسة
بعدين جلاوديوس كان بتاع أنثروبوجيا صحيح لكن كمان كان له كتاب جامد جدا اسمه "مايكونش عندك فكر" عن الزعل، وكمان عمل مقرر المواد الاجتماعية لطلبة رابعة ابتدائي سنة سبعة وتمانين وليه موسوعة مشهورة اوي اسمها إنت تسأل وأبو الجلادس يجيب. يعني كان راجل موسوعي شامل، مش بتاع أنثروبولوجيا وبس
رجع اشتراكك بقى

مارفل
ملحوظة مهمة جدا. لكن اكيد الحلقة دي هيبقى بعدها حلقات كتير عن الموضوع. ورينا همتكو انتو بس ف الاقتراحات

أبدو باشا
مقترحات مهمة جدا، وياسلام فعلا زي ما زميلكو بيقول ننتهز فرصة الشهر الكريم ونتصل نسأل عن الناس اللي واحشينا، واهو منها صلة رحم، ومنها نرضي ربنا ف رمضان، ومنها نستغل العروض بتاعة موبينيل ف رمضان ونشجعهم على العروض اللي بتفيد الخير كدا

بنت القمر
مرات رضا هتطلق مراتها؟ طب ازاي؟

بنت القمر said...

اسفه اختلط علي الامر و وحسب العرف المتوارث والسائد ركب في راسي ان الحاكي لا بد ان يكون امرأءة ورغم ان بوست الطلاق رشحته لي صديقه من فترة بعد وضع لينك مدونتك علي الريدر رشحته لي لمعرفة خريطه المكان الذي قد ادخله
متزعلش يبقا المذيع اخو رضا الغير شقيق:))
تحياتي

أحمد عبد اللطيف said...
This comment has been removed by the author.
nohaelebiari said...

بس أحب عايزة أسأل الاستاذ سؤال ربنا بتقبل مني التبرع في حملة الناس الزعلانة لو أنا مش لابسة حجاب وباشرب قهوتي بلاك ومن غير سكر؟

أسما عواد said...

ياه يا نائل انت بتقول الكلام ده عشان اسامحك ومزعلش منك
المسألة مكانتش تستاهل تحط ليها بوست كامل كان ممكن تتصل بيا وتقول انا اسف
وخلاص

ايه يعني مجتزا صغير من رواية
أما انت قلبك اسود بصحيح
سامحتك يا سيدي عشان الشهر الكريم