Thursday, December 07, 2006

معارضو الشارع


نفترض ان مثلا، بني ادم، مثقف ووطني، قرر يبقى معارض لانه فجع لما سمع عن أحداث عصابة اولاد الشوارع. وشاف ان لهذا دلالات رهيبة على مصير مصر، مصر، مصر، التلات احرف الساكنة اللي شاحنة ضجيج. طبعا مش لازم انه كان ساعتها بيتفرج ف التليفزيون على صورة النيل جنب النيل هيلتون و فلاحات لطاف وموظف مبتسم ف وش العميل
المعارض ابو ضمير صاحي قرر إنه يبقى ضد الحكومة بقوة، لانها ازاي تسمح بوجود اطفال الشوارع، و ازاي يتم تلويث الشارع المصري لهذه الدرجة المشينة، وطبعا زي ما هو معروف: خوفه الاساسي على الروح المصرية اللي بدأت تنتشر فيها امراض خطيرة ورهيبة، الشذوذ و التشرد و البلطجة والعيال اللي مخبية امواس تحت لسانها. صاحبنا مهتم بالروحانيات زي اي شخص مثقف
هو عاوز يلغي ظاهرة اولاد الشوارع باي طريقة، و اي طريقة ممكن تبقى اي طريقة، يعني زي ما هو عاوز يلغي التسول والنشل و البيع على الارصفة، بطريقة اي طريقة برضه. من المنطلق دا ممكن مثلا يكون عتبان على الحكومة لانها مش بتلم كل الحاجات دي في اوتوبيس و تفجره مثلا. وممكن يكون فكر ان لو فيه عيال بتنط على بعضها ف الشارع يبقى من مصلحة الظباط ان العيال دول يفضلوا عايشين علشان الظباط الغلابة كمان يستمتعوا، وبالتالي من مصلحته هو، كمعارض، ان العيال دول يموتوا، ومن هنا تفتق ذهنه ان اعدام العيال دول او حتى حرقهم هو انسب وسيلة ل، واحد: تطهير المجتمع. اتنين: الانتقام منهم لانهم زرعوا الخوف في نفوس اطفاله الابرياء وهو ماشي معاهم بالليل، اخينا بيحب ولاده طبعا زي اي أب مصري. تلاتة: حرمان الضباط والعساكر اللي يا عيني مش هيلاقوا حد يتسلوا بيه في الزنازين القفر اللي هما فيها. يعني هو اعلى درجات من اي معارض عادي. دا كمان ضد الشرطة، مش الحكومة بس، و بيفكر بشكل عملي، (أي: مش بيكتفي بالتنظير) في انجح الاساليب للانتقام المشترك من الشرطة ومن اللي بيلوثوا وجه مصر الحضاري. و قعد اخيرا يرسم خريطة مصر كبلد يستحق اسمه. برافو. انا شخصيا.. أنا.. آي دو لايك إيت، انا شخصيا بهنيه
احم. بالمناسبة: الفرق الإملائي ما بين محاربة الفقر و محاربة الفقراء مش كبير. دا آء بس. والتحول ما بين الاتنين مش هيوقع اي شخص في غلط لغوي رهيب. المشكلة الوجودية بقى والمزعجة اللي مطيرة النوم من عين صاحبنا شخصيا، ان الفرق اللغوي ما بين العدل والفاشية مش بنفس البساطة، و ان الخلط بينهم هيفتح عليه نيران مصححي اللغة العربية، اللي هما كمان ليهم حاجات بيغيروا عليها ومستعدين يحاربوا علشانها

6 comments:

كراكيب نـهـى مـحمود said...

جميلة اوي اوي يا نائل
اسلوبك الساخر مميز ومختلف بجد
انا شايفه ان اخينا المعارض ده بيفكر بجد في مصلحة الثلاث احرف الساكنة

Anonymous said...

قلبي معاك يا نائل
أكيد زهقت من كتر تعليقات الناس على أسلوبك، ووقوفهم عنده. الانجليز تقريبا هم اللي بيقولوا أن الأسلوب هو الرجل،

nael said...

العزيزة كراكيب
الله يخليكي بجد على ذوقك دا
ويارب يكون البوست عجبك بجد مش كدا وكدا
عموما سيبك من اخينا المعارض اللي انا قرفت منه\
انا شايف ان مفيش اي حد عنده اي جدارة اخلاقية انه يتكلم على اطفال الشوارع او يحاكمهم
انا شخصيا بحس بالخجل الرهيب قدامهم

العزيز انونيموس
الله يخليك يا عمنا. بس كلمة في سرك: لا مش زهقان. دي حاجة بتديني ثقة شوية ف نفسي و بتحسسني شوية اني بعمل حاجة كويسة
انت اخبارك ايه بقى؟

Anonymous said...

والله بخير يا نائل، طمني انت عليك

Anonymous said...

be well friend
life is too short to be taken seriously!

Anonymous said...

Hеy thiѕ is somewhat of off topic but
I was wanting to know if blogs use WYЅӏWYG editoгs οr if уou hаve to manually code wіth
HTML. ӏ'm starting a blog soon but have no coding skills so I wanted to get guidance from someone with experience. Any help would be enormously appreciated!

Stop by my site: walmart garden centers
Also see my webpage > houston garden centers pasadena tx