Monday, March 05, 2007

المدونة كعلاقة جنسية

في يوم من الايام. كنت انقطعت كتير عن التدوين وبعدين رجعت له تاني فجاة، اخويا احمد شعبان بعت لي انه سعيد بعودة مدونتي اللي هو مش عارف انا بعاملها كدا ليه زي اللقيطة لغاية مابقت خرابة. خرابة وطفل لقيط. وانا بعد كدا بواصل علاقتي بالمدونة، بقطعها وبواصلها، بقطعها وبواصلها، كان الكلمتين دول اكتر حاجات لزقت ف دماغي ، خرابة وطفل لقيط، وبما ان المدونة هي ارض اللقاء الجنسي "الخرابة" وثمرته في نفس الوقت "الطفل اللقيط"، وبما ان كان واضح من كلامه ان الطرف التاني في اللقاء الجنسي دا لازم تكون شرموطة مش صديقة، "خلوا بالكو ان اللقاء الجنسي اللي اقترحه احمد شعبان ماكانش مصدر للمتعة وانما مصدر للاهانة، يعني مصدر اني اطلع دين ام مدونتي علشان هي بنت حرام، او بنت ذكرى مش عاوز اتذكرها، او على طول بتدنس الدم النبيل الملكي الذي لي بتذكيري بالجارية السوداء اللي فرشتها في الخرابة زمان"، بما ان كل دا حاصل، فاذن هلموا يا رجال، مبرر لي اذن اني اطلع دين امها، واضحك عليها ف فلوسها واضربها واهددها اني اجيب لها البوليس، وانا لابس الروب ديشامبر على اللحم وبدخن سيجار ونص كلامي بالفرنساوي. فلة يا احمدقريب جدا، واحدة صحفية اتصلت بي وقالت لي طيب وايه رايك في استغلال الكاتب مدونته للدعاية لاعماله. قلت لها اني مش مع دا. سبلت عيوني وانا بفلسف لها فكرة المدونة. المدونة هي القناع اللي الواحد بيستخبى من وراه. متنسيش نشطاء كفاية اللي قدروا يستخبوا ورا اسامي مدوناتهم علشان محدش يعرفهم. كانت اروبة. قالت لي طيب ماانت مخلي اسمك هو اسم المدونة. قعدت اضحك زي الاهبل وقلت لها في الاخر اني طبعا مش ملاك واني بعمل الغلط اللي انا مش حابه. طبعا افتكرت ناس كتير. طارق إمام، باسم شرف، محمد صلاح العزب، احمد العايدي وغيرهم، بنتعامل مع المدونات اكنها مواقع شخصية. مش بس كدا، لا دا كمان بنعامل مدوناتنا كهوانمنا، كمداماتنا، مراتاتنا، او حتى بناتنا، اللي بنديها اسامينا، طبعا خدتو بالكو. الهانم المدونة عكس خالص صباح الجارية المدونة اللي فرشناها في اول التدوينة دي. واذا كنا في مجتمع كامل، بيعامل مدوناته كاطفال لقيطين، ماعدا كام اسم انا قلتهم دلوقتي، يبقى الكام اسم دول، اللي مديين اساميهم لمدوناتهم، هما طبقة الكريمة اللي فوق وش المجتمع، هما الارستقراطية البائدة في وسط مجتمع كله بيزبط في اي خرابة قريبة، وزي اي ارستقراطية بائدة، اكيد شكلنا هيبقى مضحك جدا واحنا بنشوف اي بتاعة فجل فنبوس ضهر ايدها ونقول لها انشانتيه يا هانم، لكن كمان دا ليه مميزاته، اكيد محبي التحف هيحبونا اوي، واكيد ان نرجسيتنا وحبنا لذاتنا، هتقدر تدافع عنا ضد هذا المجتمع المتعفن المتوسخ المتفسخ المتفشخ يا زمان المسخ بعمارة يعقوبيان، مش بالاندلس، تيك كير

14 comments:

محمد مصطفى said...

تتشرف مؤسسة ورقة وقلم بدعوتكم لحضور الدورة الثانية من مهرجان سوا للجماعات الأدبية
و المهرجان في دورته الثانية سيكون في شكل سهرة أدبية للجماعات الأدبية و بمشاركة فرقتي شر و صندوق الدنيا المسرحيتين
و ذلك السبت الموافق 10/3/2007 في تمام الخامسة بالمسرح الرئيسي بحديقة السيدة زينب الثقافية
ش محمد قدري باشا متفرع من ش بور سعيد - السيدة زينب

عبده البرماوي said...

بصفتى الضيف رقم 266 لهذه المدونة الحلوة أود تهنئتكم على أى حاجة والسلام
أما من ناحية العلاقة الجنسية مع المدونة فده شئ رهيب ولابد ع الواحد نينا نحن المدونين انه يراعى كون مدونته متخصهوش لوحده وعلاقة بيها فى العلن قدام الناس ده حتى الناس بتخش مدونته فيعنى يعنى لا مؤاخذه اللى بيحصل فيها كل ده تنفع تعمل معاها علاقة
كلمة اخيرة اتقوا شر مدوناتكو

محمد صلاح العزب said...

يا عم نائل أنا ممتن لحضرتك جدا عشان خلتني أرستقراطي
طول عمري أموت وأبقى أرستقراطي فكونك حققت لي ده يخليني أقدر أقولك
شكرا يا ولد
عفارم عليك

محمد صلاح العزب said...

نسيت أقولك اني زعلت جدا عشان انت استسلمت وغيرت انك لاسع وخدت الأمور بجد
كاتب وصحفي ومترجم
بس لاسع برده.. وهذا رأفضل مايميزك ..وإلا فلا
مساء الجمال وبطل تزنق مدونتك عشان ده يا أستاذ ممكن يعد تحرش إلكتروني

باسم شرف said...

نائل

محمد العزب كان نفسه يبقي ارستقراطي فربنا نولهله في مدونتك .. وانا كان نفسي في البشوية او خلينا طبقة متوسطة عشان مدفعش كهربا كتير مع الزبالة ..

ياعم دي حاجة اعتز بيها من كاتب وروائي بعزه وبحترمه
اشكرك

جبهة التهييس الشعبية said...

اه طيب انا حبيت اتخفى واسمي المدونة باسم حركي

وفجأة لقيت كل اللي داخلين يقولوا: نوووووووارة مبروووووووووووووك

أحمد شعبان said...

السيد الفاضل صاحب المدونة

عفواً، هوه أنا - ودا للأسف طبعاً - لم يسبق لي شرف التعرف إليك، وظننت أن هناك تشابه أسماء إلا أني وجدت اللينك منفد على مدونتي فتعجبت!!، وبغض النظر عن استخدام مصطلح مراوغ مثل "أخي" فأنا حامشيها على أساس الفكرة إن كلنا إخوة في الدين، فما علينا من هذه الجزئية، إلا أنني وبشكل عام لم أفهم كثيراً من الكلام المكتوب هنا
على أي حال
تقبل دعواتي بالشفاء في أسرع وقت

a, sh
أخوك برضه مفيش مانع

محمد صلاح العزب said...

إيه يا عم نائل انت مت ولا إيه
دخلت عشرين ألف مرة
الراجل كاتب لك انه ما يعرفكش
وانت بتقول انه أخوك
وهو بيقولك انه هيعديهالك على أساس اننا كلنل إخوة في الدين
وأنا عارف ان موضوع اخوة في الدين ده مش هيجيب أوي معاك
وهو قايلك تقبل دعواتي بالشفاء في أسرع وقت
كل شويه أدخل أشوف انت رديت قلت إيه
ألقيك لا دخلت ولا علقت
قلت في نفسي يبقى الراجل عنده حق وانت بتعمل نفسك صاحبه بالعافية وخلاص
وبعدين قلت أكيد في سوء تفاهم
ما تدخل ياعم وتحل لنا أم الإشكال ده اللي محير كل المدونين الناطقين بلغة الضاد

عموما لو طلع الراجل عنده حق وانت فعلا ما تعرفوش أنا ممكن أخدكم انتو الاتنين على التكعيبة
واجيبلكم اتنين شاي بحليب سكر بره
واعرفكم على بعض
مع اني بشك إذا كنت أعرفكو أصلا

nael eltoukhy said...

يا عم العزب ارحمني
يا عم ما نت عارف اني راجل مزاجنجي. برد على مهلي وبكتب على مهلي. لازم تستفزني يعني؟ عموما ماشي.. هرد دلوقتي بقى.. اولا.. اكيدانت سعيد جدا اني اكتشفت الجذور الارستقراطية جواك.. طبعا سعيد.. لازم تكون سعيد.. اذا كنت انا نفسي فرحت لك، اهي حاجة تلعب بيها بدل الصياعة اللي انت عايش فيها
ثانيا انا شلت لاسع وكدا كنوع من التغيير.. ممكن اغير كمان قريب. كاتب وص حفي ومترجم دي مجرد مرحلة انتقالية، وكاي مرحلة انتقالية لازم تبقى بضان نسبيا كما لاحظت فخامتكم

العزيز وجع دماغ
ما هو لو كل الناس بتخش المدونة فعلا يبقى هي مدونة لمؤاخذة.. وطالما ان صاحبها حاطط اسمه عليها فيبقى هو كمان راجل لمؤاخذة.. وتبقى فيه علاقة تواطئء لذيذة كدا بين المدونة وصاحبها، شرموطة ومعرص، لكن مش اي معرص، معرص ارستقراطي، باشا
وهذا افضل من اي شيء

بسوم
مافهمتش يعني اوي. العزب ربنا نوله الارستقراطية ف المدونة.. طيب انت ربنا نولك البشوية في المدونة ولا لا؟.. خلي بالك الاجابة على السؤال دا مهمة جدا علشان عاوزين نطمن على اخبار الكهربا بتاعة سعادتك لانها ان تشرق في قصر معاليك فقد اشرقت في قلوب رعاياك يا مولانا

الجبهة الجبهة الجبهة
دي مشكلتك.. وهي مشكلة فردية خالص.. لان مدونتك كدا بقت على الحد ما بين الهانم ودادة صباح، ولازم لها تسجيل مناسب في ادارة السجلات

nael eltoukhy said...

عزيزي احمد شعبان
ارتأيت يا أخي الكريم أن أفرد لك ردا خاصا نظرا لمبلغ الاسف الذي يعترنيني لما حدث من لبس غير مقصود ومن غلط غير محمود بيني وبينك، اولا انا اعتز يا اخي باخوتك كثيرا، وكوننا اخوة في الدين فهذا اوثق الروابط واقواها امام رب العالمين يوم القيامة ... احم.. ان شاء الله طبعا.. حيث اعزنا الله بالاسلام دينا وبالقرآن كتابا وبسيدنا محمد نبيا ورسولا
اما عن اللبس الحادث في مدونتي بينك و بين من لا يجل اسمه و لا يحترم ذكره احمد شعبان فاحببت ان اخبرك انه لربما كان احمد شعبان اخر.. وذلك بناء على قرينة واحدة، اذ يبدو لي من كلامك انك عف اللسان.. قوي البيان.. كما يلوح لي من صورتك انك شخص كامل الاوصاف، محمود السيماء واعتقدت من النظارة، وارجو التصويب لي، ان لك باعا في الادب او كما قال رب العالمين عز وجل "سيماهم على وجوههم". وذلك على العكس مما يتسم به الاخ احمد شعبان السالف الذكر.. فهو منتحل متأدب غير أديب.. ومتأرب غير أريب.. وهو لجوج حقود حسود ليس في الشيطان شر منه.. أما والله إني يا أخي فلأشفقن عليه من عواصف الدهر وغوائل الأيام ولكن أيضا من غضبة منتقم جبار لا يعجبه الحال المايل، ودا واد م الاخر ميعجبكش يا مولانا
أما عن سر ما حدث وعن اللينك الذي أوصل إليك فهو أن أحمد شعبان الذي أرسل لي بهذه الرسالة لم أعثر له على أثر ولم أجد له ذكرا في مشارق الأرض ومغاربها، فقلت هاإني لأعمل سيرش عنه في الجوجول، فإذ بمدونتك تنط لي نط البطة المسماة بطوط في مدينة البط.. وهي قصة لو تعلمون عظيمة، يقرأها الصغار ولا يدعها الكبار، وليست تافهة وليست هبلة وليست وليست وليست كما يتقول عليها الحاقدون المتقولون المتخرصون. ما علينا، فما كان مني إلا أن ، بعجالة هي من الشيطان وبلهفة هي من البضان، إلا أن وضعت لينكك على اسمه الذي اكتشفت فيما بعد أنه اسمك أيضا، وحاشاك يا مولانا أن تشبه في شيء هذاك الواد المايع المايل ، ولكنها الحقيقة، تشابه أسماء يرفع من قدره للاسف، هذا المخسوف بقيمته الارض، ويقلل من قدرك أن تشبه في شيء هذا الأحمد الشعبان التوفيق، حتى إن شابهته في اسمه الثلاثي كمان، وليس الثنائي فحسب
وبعد، أكرر اعتذاري بشدة لك وعسى أن يجمعنا ظرف أفضل من هذا قريبا يا زداحمد

أحمد شعبان said...

أكبر بأه يانائل

جبهة التهييس الشعبية said...

القصاص لشهدائنا من الاسرى

islam yusuf said...

ما تكبروا بأه يا جماعه

محمود فهمى said...

والله دا كلام فيه نظر