Friday, September 14, 2007

عن النوبة والحجاب معنا من القاهرة هاني مصطفى


بمنتهى الصراحة، لست معاديا كبيرا للحجاب، الحجاب الذي لا يمنع البنات من أن يتشرمطن وأن يرقصن وأن يمشين بحضن شباب على الكورنيش وهن عارفات بأنهم بيضحكو عليهن، الحجاب الذي لا يمنع البنت أن تكون مبسوطة وأن يتم تقفيشها في كل الأماكن، الجغرافية والجسمانية، هو حجاب جدير بأن نرفع له قبعاتنا تحية. بالمناسبة، وللعلم فقط، فأنا لا أملك موقفا حاسما ضد النفاق.

***

عندما شاهدته لأول مرة في الكلية، ظننته إسلاميا، كان يرتدي طاقية بيضاء كالتي يرتديها الشباب الذي صار "ملتزما"، شيئا فشيئا بدأ هاني مصطفى يكشف عن نفسه وعن أنه يمكن للشخص أن يلبس ما يحبه بدون أن يكون لهذا علاقة بالالتزام، ببساطة يعني. وهكذا، وبعد ذلك، في الوقت الذي كان فيه زملاء المرحلة التالية يتعرفون على بعض في ندوة محمد جبريل الخميسية كنت أنا أسهر ليال متوالية مع هاني في رمسيس والتحرير والقلعة أحيانا لنتحدث حول السينما والمزيكا والكتابة. لم يكن هاني مخلصا لفن بعينه، كان يتحدث عن السينما مثلما يتحدث عن الغنا وعن المسرح زي الكورة، وعن الفن التشكيلي زي الرقص. بعد ذلك، وعندما أصبحت لقاءاتنا أكثر تقطعا، عرفت أنه ينشر صوره الفوتوغرافية في مجلات أمريكية، كان قد أصبح مهووسا كاملا بالفوتوغرافيا.

***

كنت مع هاني مصطفى يوما ما نعد عددا خاصا عن الكتابة المصرية الجديدة لموقع أكسجين، هو بالفوتوغرافيا وأنا باختيار النصوص. تشاجرنا كثيرا حول صورة بعينها، كانت له صورة تظهر فيها بنت سافرة ترقص وسط مجموعة من البنات المحجبات، انبهرت بالصورة وألححت في طلبها منه أما هو فألح في الرفض مفضلا عليها صورة لبنت واحدة محجبة ترقص وسط مجموعة من الشباب، كانت تتثنى بغنج وبدلع كاملين، نصفها الاسفل ثابت على الارض اما الاعلى فمائل على الشباب تضحك بسلطنة وبدلال، ويداها تومئان في الهواء أن ياللي مابتشوفش شوف، الآن أقول يا الله ما أعظمها، أما وقتئذ فقد كان لي رأي آخر. عرفتم إذن لماذا ابتدأت التدوينة بالحجاب. الصورتان في البانر الجانبي المخصص كله هذه المرة للمسيو مصطفى.

الرقص هو شيء مهم جدا في صور هاني، والرقص النوبي بالتحديد، نتيجة لعوامل تتعلق بالجينات، ولكن ليس أي رقص نوبي. قال لي مرة إن النوبي مينفعش يطلع في أي فيلم إلا وهو في النيل على مركب بيرقص بجلابية بيضا، النوبي كائن لا يعيش إلا في المياه زي التماسيح. يدخل ضمن هوية النوبي كونه حيوانا منقرضا. والنوبة لا تعني إلا الماء مع الصخور والراقصين والجلاليب البيضا. والمقادير من كل شيء كثيرة جدا. هذا هو التعريف المعتمد للنوبة. وهو تعريف سهل ولا يتطلب تفكيرا عميقا. النوبة في صور هاني تحوي اشياء اكثر قليلا من هذه الأشياء بالمناسبة.

***


استطاع هاني مرة أن يجعل من وجهي شيئا مهما عندما التقط له صورة وأنا أحدق في البعيد وقص أطرافها وزبطها. كانت صورة ممتازة، ولهذا السبب بالتحديد، فقد كانت لا تشبهني. فور ما رأيتها سألته مين دا، وهكذا سألني كل من رآها. لم تكن صورة جميلة، كانت مهمة، كأنني أفكر، كأنني مهموم، كأني قلق على مصير الوطن.

***

اعتراف خطير: ربما أكون بغير من هاني، بل أكيد أنني بغير، وكثيرا جدا أيضا. فتيات المدونات الرقيقات يحببن كتابة عبارات من نوعية "وش أحمر من الكسوف". الآن أجد نفسي مضطرا لقولها.

***

بإيحاء أسلوبي من بيسو:

أعزائي القراء. من أجلكم أنتم، من أجل سعادتكم ورضاكم، سهر هاني مصطفى يعد صوره. ذرف الكثير من العرق والجهد لكي تخرج صوره في الشكل الذي تحبونه. مجردا من الأهداف باستثناء حبكم تعلم ودرس وأنجز شغله على الوجه الاكمل. يشكركم هاني على تشجيعكم له ويعلن أنه لولا هذا التشجيع لما كانت هذه الصور قد خرجت للنور.

إليكم يا حضرات الموقع الشخصي لهاني مصطفى

17 comments:

fawest said...

من المهم جدا الخلاف بين الاصدقاء
خصوصا بين شباب نخبةى يتنازى على رؤى معينة حول موضوع هام لهذا انت لا تغير


ثم لية مشفناش صورة معاك فى البوستات من زمان
باين انكوا بتعملو احلى شغل
خليتة يكتب على الحيطة
جننتة يعنى


انا هشوف الملف فى أكسوجين
بالنسبة للشكل مع خلق اللة
يعنى انت مش شايف ان شاكلت هانى
من وجهة نظرى الشخصية ان الصورتين واحدة
كل الموضوع اختلاف زاوية الرؤية

Mirage said...

هى صورتك دى صورة واحد تانى مش انت اساسا

:)

بس عموما انا متفق معاك تماما فى أول كلامك عن الحجاب

رأى منطقى ومظبوط جدا

soha zaky said...

بما انى مش محجبة فانا ممتنعة عن التعليق عن النقطة دى بالتحديد، لكن تحياتى للمصور الرائع المدهش بحق هانى مصطفى صديقك وانا بصراحة شايفة ان الصورة صورتك مش صورة حد تانى ، لأنه ببساطة كان شايفك كويس اوى اوى ، يعنى انا رأيى ان المصور لما بيحب اللى بيصوره بتطلع الصورة حلوة لا أيه

تامر said...

44774477هاني مصطفى
صديقي الرائع الذي أفتقده بشدة
صاحب العين المختلفة الذي فرحت الآن عندما عرفت أنه استطاع أخيرا أن يوظفها لصالحنا نحن قبل أن يكون الأمر لصالح عينه ذاتها
هاني الذي انقطعت أخبارنا عنا منذ زمن، فجئت يا نائل لتعيدني له بهديتك الرائعة:ـ موقعه الشخصي
شكرا لنائل، وشكرا لهاني

Anonymous said...

شوف يانائل
مش نائل ده اسمك بردو؟

من غير عصبية ولا شدة لسان ولا ردود جارحة منك

كنت عايزة اقولك حاجة كده

هو انت مش ينفع مع كون المدونة مساحة شخصية حرة ليك انك تستخدم اسلوب احسن فى الكلام؟

تانى مرة ادخل عندك واحس انك بتتعمد تستخدم الفاظ مقززة بغض النظر عن الموضوع

لو دى طبيعتك تبقى مصيبة
ولو دا بحكم حريتك فتبقى المصيبة اكبر

ممكن تعترض ع الوضع باسلوب احسن وممكن تعرض وجهة نظرك بلسان احسن

هتقوللى وبتدخلى ليه لما انا بضايقك وبخدش حيائك كمان؟
هقولك دى الحرية وكمان بقول يمكن يمكن الاقى وضع صح

طريقتك كمان فى التعبير عن اى شىء يخص البنت او الست الجنس الانثوى عموما خالية تماما من اى احترام
احيانا بحس انك معقد وفيه ازمة فى حياتك هى السبب

عموما
مش كل البنات زى اللى انت بتشوفهم
ومش كل الناس نسيت ان فيه شىء اسمه الدين والخلق والادب والقيم
لسه بنتربى ع الحاجات دى

وانت يظهر لسه ماشفتش احسن من اللى بتتكلم عنه

ربنا يهديك وينضف لسانك شوية

على فكرة
انا لم اقصد اهانتك بأى حال
أنا بس بلفت نظرك رغم انى متوقعة سيل السب اللى هيقع منك عليا بعد ماتقرا تعليقى

بردو عموما
رمضان كريم

Reham Ragab said...

الحقيقة لم أكن أنوي التعليق على هذه التدوينة، ليس لشيء بل لأن الفن الفوتوغرافي للأستاذ هاني مصطفى أعظم من التعليق عليه، وأشكرك على تقديمه إلينا.. لكني قرأت تعليق الأنونيموس اللطيفة التي لا يعجبها ألفاظك، فقط أردت أن أترك لك تعليقا مناظرا..
أنا أشكرك على استخدامك لهذه النوعية من الألفاظ وهذا الأسلوب تحديدا.. أنا أرى أنه مليء بالاحترام تجاه جنس النساء.. وتجاه جنس الرجال، وتجاه الجنس المصري كله، الذي يستخدم هذا الأسلوب في حياته اليومية بغض النظر عن مستواه الاجتماعي وخلفياته الثقافية، وهذا الأسلوب هو لغته التي يفهمها، والتي تحترمه أنت من خلالها.. وأهم من كل السابق، مليء بالاحترام تجاه ذاتك.
وأنا أرى أن احترام الذات كفيل بدفع كل الأثمان مقابله، والضمير المرتاح في الليل أهم عندي من كل المعايير والموازين المغلوطة.
ولا أتعجب منها إذ ترى أن كون هذا نابع من طبيعتك أو حريتك "مصيبة"، ولكنها تتغنى بذات الحرية في البحث عن مبرر لتعليقها..
وعن ما ورد في التدوينة من اراء تسبق الحديث عن فن الأستاذ هاني مصطفى، أوافق عليها في المجمل والتفصيل والأسلوب والألفاظ، وأشكرك مرة ثانية!

م said...

واحب اضيف لمعلوماتك ان فيه ناس حراميه بيصلوا وكمان بيصوموا
وبناء عليه اطالب بمنع الصلاه والصيام لان السرقه حق اساسى من حقوق الانسان ما نقدرش نقوله بطلها
زيها زى الرقص بالظبط

nael eltoukhy said...

فاوست
كان اول شغل مع بعض هو عدد اكسجين وان شاء الله مش هيبقى اخر شغل
بصراحة.. مش شايف اني شاكلت هاني
كل الموضوع اختلاف زاوية الرؤية
:)

ميراج
مش بقولك صورة حد تاني يا عم!؟

سهى زكي
كان شايفني ازاي يا بنتي؟ يعني اذا انا نفسي ماكنتش شايف نفسي. انا نفسي مقتنعتش ان دي صورتي الا بعد دقيقتين من التأمل المأخوذ، ولغاية دلوقتي مش مقتنع مية في المية يعني
:)

تامر
سعيد جدا اني قدرت اخليك تشوف موقعه. هاني فنان جميل بجد وصعب اوي على اللي شاف شغله انه ينساه. شكرا ليك انت

المجهولة

هو انت مش ينفع مع كون المدونة مساحة شخصية حرة ليك انك تستخدم اسلوب احسن فى الكلام؟

اكيد ينفع. بس خلينا الاول نتفق على معنى كلمة احسن.

تانى مرة ادخل عندك واحس انك بتتعمد تستخدم الفاظ مقززة بغض النظر عن الموضوع

مقززة آه. بتعمد وبغض النظر عن الموضوع لا.

هتقوللى وبتدخلى ليه لما انا بضايقك وبخدش حيائك كمان؟ هقولك دى الحرية وكمان بقول يمكن يمكن الاقى وضع صح

بس انا مقلتلكيش بتدخلي ليه. انا شايف فعلا ان من حريتك وحقك انك تدخلي.. بيتهيالي ان انا مش البني ادم اللي مستعد يجرح اللشخص اللي بيعلق علشان اتجرأ ومعجبوش اللي هو كتبه

طريقتك كمان فى التعبير عن اى شىء يخص البنت او الست الجنس الانثوى عموما خالية تماما من اى احترام

دا مش صحيح. لو تقصدي على الالفاظ فانا معتقدش ان الواحد ممكن يعبر عن احترامه للمرأة بإنه "ينضف لسانه" وف نفس الوقت يفضل محمل بنفس النظرة المتدنية ليها. بشكل عام، تسعة وتسعين في المية من الرجال ونسبة كبيرة من النساء ينظرون للمرأة على انها "......" ويتعاملون معها على أنها ".........."، وهذا واضح بدءا من علاقات الجامعة وحتى الخطاب اليومي وحتى عقود الزواج والطلاق. هل يفرق هنا كونهم يعفون ألسنتهم عن استخدام اللفظ الحقيقي الذي يشعرون به تجاه المرأة؟ انا شايف اننا بنعيش في مجتمع منافق بلا أمل في إصلاحه والنفاق أفسدنا لدرجة ان فتاة معينة تشعر بانتهاك لحيائها من لفظ صريح ولا تشعر بالانتهاك من رؤيتها لعقد زواج يحولها الى شيء فعلا تشترى متعته بالمال، ولا تشعر بالانتهاك من قبل خطاب يحولها إلى "......." فعلا ولكنه لا يزال يتحدث عنها، مع تسبيلة عيون، عن كونها "الأخت والزوجة والأم".

احيانا بحس انك معقد وفيه ازمة فى حياتك هى السبب

بيتهيالي انتي متحبيش اني اتدخل في خصوصياتك. اعتقد ان انا كمان من حقي ان محدش يتدخل في خصوصياتي او يناقش "أزمات حياتي" بدل مناقشة كلامي. يا ستي لما ابقى اكتب بوست عن الأزمات اللي في حياتي وعن عقدي ابقي اتدخلي محدش هيمانعك.

ربنا يهديك وينضف لسانك شوية

شكرا الله يخليكي

بردو عموما رمضان كريم

شكرا

ريهام. اشكرك فعلا. اللفظ مستخدم كثيرا جدا وبين جميع الطبقات. لا اعتقد ان من الاشياء المهمة هنا لأن يداري الواحد عليه ليعيش صورة مزيفة عن الواقع.

محمد الهنداوي.. لا طبعا. السرقة مش زي الرقص. ببساطة كون البنت ترقص فهي مبتأذيش حد. إنما السرقة فيها أذية للغير، ودا مش محتاج ذكاء كتير علشان الواحد يعرفه. كون ان الاتنين، السرقة والرقص، حرام زي بعض في الدين او مش حرام فمش هقدر افتي فيها لاني غير مؤهل للحديث باسم الدين. انا فقط مؤهل للحديث باسم ما اقتنع به. وما اقتنع به هو ان إيذاء الغير هو حاجة مش كويسة، وان عدم ايذاء الغير هو حاجة كويسة

Anonymous said...

السلام عليكم يا نائل
كل سنة وانت طيب
طبعا انت عارف اني مختلف مع كل ماقلته وتقوله وسوف تقوله
لكن يبقى هاني مصطفى هو ما يجلعني احتملك واعصر على نفسي ليمونة واكتب تعليقا في مدونتك
هاني المخلوق النوبي الجميل النبيل والصديق
الرائع برغم التقاؤه معك في جزء كبير من الدماغ اللي مش ولا بد
===============
مع كل شىء ورغم كل شىء ومن وراء كل اختلاف تحياتي لكما لانني احبكما بجد
طارق قاسم

م said...

انت قلت انك ماتعرفش اذا كان السرقه حرام زى الرقص ولا لا
وبتقول انك بتكتب اللى من عقلك وبس
طيب عاوز اسألك عن عقل سيادتك
انت حطيت صورة بنت لابسه ايشارب(وانا مش هقول محجبه لان الحجاب مش مجرد غطاء للشعر بس ده مش موضوعنا) وكانت بترقص وبعدين مش عاجباك
وفى نفس الوقت بتقول ان اللى بترقص مش بتأذى حد
طيب انت اللى ضايقك انها مغطيه شعرها ولا انها بترقص
وياترى كونها مغطيه شعرها ده اللى بيأذى الناس طالما ان الرقص مش مؤذى
وهى تفرق عندك ان البنت ترقص بشعرها او ترقص بايشاربها
طيب الرقص حلال للى كاشفه شعرها
وحرام على اللى مغطياه
ولا ايه الحكايه
انا على حد علمى اننا عندنا دين وعندنا حاجات اسمها حرام وحلال
وربنا لما بيحل حاجه او يحرمها ما بيعملش قسم للمحجبات وقسم لغير المحجبات
هو احنا لما نيجى نتحاسب مش هنتحاسب طبقا لمعيار واحد برضه؟
ولا فيه حساب للمتدينين مثلا وحساب خاص للاخوه اللى مش؟
وبعدين مين قاللك ان اللى بترقص مش مؤذيه لغيرها؟
وايه حكاية النفاق فى ان الراجل لما يتجوز يمارس حياته الطبيعيه مع زوجته
ايه العيب فى كده او التقليل من شان الست فى كده
اللى اعرفه برضه ان دى سنة الرسول الكريم وشرع ربنا
والانبياء اتجوزا عادى واحنا مش احسن منهم

nael eltoukhy said...

طروق
طبعا انت عارف اني مختلف مع كل ماقلته وتقوله وسوف تقوله، لكن يبقى طارق قاسم المخلوق الصعيدي العرايشي الجميل النبيل والصديق الرائع برغم التقاؤه معك في جزء كبير من الدماغ اللي مش ولا بد :)))))))))))))))))))))

عزيزي محمد الهنداوي

فيه ف كلامك كذا نقطة
اولا بتقول: " انت حطيت صورة بنت لابسه ايشارب وكانت بترقص وبعدين مش عاجباك، وفى نفس الوقت بتقول ان اللى بترقص مش بتأذى حد، طيب انت اللى ضايقك انها مغطيه شعرها ولا انها بترقص"
انا ردي ببساطة ان كلامك دا غلط من الاساس. لان مين قال اني كنت متضايق سواء من حجابها او رقصها. انا اتكلمت بوضوح اني بحب النوع دا من الحجاب. وقلت: " الحجاب الذي لا يمنع البنت أن تكون مبسوطة وأن يتم تقفيشها في كل الأماكن، الجغرافية والجسمانية، هو حجاب جدير بأن نرفع له قبعاتنا تحية." وقلت ايضا معبرا عن اعجابي بها: " أما هو فألح في الرفض مفضلا عليها صورة لبنت واحدة محجبة ترقص وسط مجموعة من الشباب، كانت تتثنى بغنج وبدلع كاملين، نصفها الاسفل ثابت على الارض اما الاعلى فمائل على الشباب تضحك بسلطنة وبدلال، ويداها تومئان في الهواء أن ياللي مابتشوفش شوف، الآن أقول يا الله ما أعظمها." يعني فعلا انا كنت مبسوط من الاتنين. من الحجاب ومن الرقص. حكاية اني كنت متضايق دي بقى ياريتك تقولي انا قلتها فين.
بعدين حضرتك بتقول: "انا على حد علمى اننا عندنا دين وعندنا حاجات اسمها حرام وحلال. وربنا لما بيحل حاجه او يحرمها ما بيعملش قسم للمحجبات وقسم لغير المحجبات. هو احنا لما نيجى نتحاسب مش هنتحاسب طبقا لمعيار واحد برضه؟" تمام. يمكن يكون كلام حضرتك صح. بس انا ببساطة مقدرش اقول صح ولا غلط لاني مقدرش اتكلم باسم الدين فعلا. يمكن يكون حرام ويمكن يكون حلال. انا اجهل من اني افتي او اني اتناقش في الدين.

حضرتك بتقول: "وبعدين مين قاللك ان اللى بترقص مش مؤذيه لغيرها؟" وانا تخيلت انك هتشرح هي اذت غيرها في ايه لكن حضرتك ما شرحتش. انا نفسي اعرف هي اذت غيرها في ايه، واذت هنا طبعا يعني اذية مادية، يعني تسببت في قطع عيشه، عورته. سرقته. اذية زي اذية السرقة يعني اللي حضرتك استشهدت بيها.

حضرتك بتقول: "وايه حكاية النفاق فى ان الراجل لما يتجوز يمارس حياته الطبيعيه مع زوجته. ايه العيب فى كده او التقليل من شان الست فى كده. اللى اعرفه برضه ان دى سنة الرسول الكريم وشرع ربنا. والانبياء اتجوزا عادى واحنا مش احسن منهم". افهم من كدا اننا قلت حاجة ضد الجواز او ضد الجنس. طيب ياريت حضرتك تطلعهالي. انا فاهم اني اتكلمت عن شروط عقد الجواز زي المغالاة في المهور اللي بيحول البنت لسلعة او الاصرار على "العريس الجاهز" واختفاء مفهوم ان يبدأ الاثنان من الصفر سويا، دا اللي انا قصدته وكان واضح من كلامي. انما كوني اتكلمت عن اني ضد الجواز او الجنس بشكل عام فدي حاجة اعتقد اني مقلتهاش ولا ان في عاقل ممكن يقولها.

م said...

الاخ نائل
لو مفهوم الاذيه عندك هو الاذى المادى فقط يبقى حانا بنتكلم من زاويتين مختلفتين تمام
انا لو حد اتسبب انى اشيل ذنب يبقى اذانى
واذا كان البنت محرم عليها تبين جزء من جسمها بديهى جدا يبقى حرام انها تقص وتتمايل زى مانت وصفت كده
ولما نتكلم احنا فى دينا عن حاجه بسيطه وواضحه مش معناه اننا بنتكلم باسم الدين او اننا بنفتى
لان الفتوى لها تعريف اخر لم اخض فيه ولن افعل
وبعدين انت قلت انك مش مضايق لا من ايشارب ولا من الرقص
امال ايه تفسير التعليق اللى مكتوب فوق الصور؟
وهل انا فهمت صح انك ضد الحجاب اللى يمنع البنت انها(تتقفش) على حد تعبيرك ومع اللى يسمح لها بكده؟
يعنى ايه الكلام ده؟
فسر لى مادام بتقول انى فهمتك غلط

nael eltoukhy said...

- لو مفهوم الاذيه عندك هو الاذى المادى فقط يبقى حانا بنتكلم من زاويتين مختلفتين تمام

- تمام. انا كنت اقصد بالاذية الاذية المادية. وبالتالي فاحنا بالتأكيد زي ما حضرتك اشرت بنتكلم من زاويتين مختلفتين تماما

-ولما نتكلم احنا فى دينا عن حاجه بسيطه وواضحه مش معناه اننا بنتكلم باسم الدين او اننا بنفتى

- ماشي يا عم. انا حتى مش مؤهل اني اتكلم في الحاجة البسيطة الواضحة دي، لاني اجهل من اني اتكلم فيها. حضرتك ممكن تتكلم فيها لو حضرتك تعرف. بس انا مش هقدر اوافقك او موافقكش. انا فعلا ماقدرش وماحبش، وعلشان كدا انا بتحاشى اني اتكلم في الدين او في وجهة النظر الدينية لاني اجهل من كدا انما بتكلم عن اللي انا بقتنع بيه بس، ولو حضرتك حابب تخلي النقاش نقاش ديني فانا مش هبقى حابب دا

-وبعدين انت قلت انك مش مضايق لا من ايشارب ولا من الرقص
امال ايه تفسير التعليق اللى مكتوب فوق الصور؟

-تقصد تعليق. رقص وهلس ومسخرة. دا كان تعليق ساخر

-وهل انا فهمت صح انك ضد الحجاب اللى يمنع البنت انها(تتقفش) على حد تعبيرك ومع اللى يسمح لها بكده؟

-هو حضرتك عاوزني اقول اني ضد الحجاب. بس انا فعلا مش ضده. لا الحجاب اللي بيمنع البنت ولا الحجاب اللي بيسمح لها. كل اللي قلته اني بحترم الحجاب اللي بيسمح لها أنها "تتقفش" على حسب تعبيري، واني بحبه. هل دا معناه اني ضد الحجاب التاني؟ طبعا لا. مش فاهم منين حضرتك جبت منين الفكرة دي؟ انا مش حاسس ناحية الحجاب التاني بحاجة ومفكرتش فيه بشكل معين وبالتالي متكلمتش عنه. تمام كدا؟

عباس العبد said...

انضم الى الحملة
حملة
سى السيد
vs
كلنا ليلى
شارك معنا فى اعادتهن الى رشدهن
طالبهن رفع شعار
كلنا امينة
زوجة سى السيد
....
قولوا ورايا يا بنات
كلنا امينة

جوستيـن said...

اه دي صورة واحد تاني

Anonymous said...

لكم أعشق النوبة
وأعشق النوبيين
خاصة فى تعصبهم لجنسهم وعرقهم ورفضهم اختلاطه بعرق آخر

عشق للهوية والجذور

عشق انقرض من نفس المصرى الحالى مختلط الأعراق

أعشق فيهم رائحة مصر الحقيقية التائهة
وتتعجب من انتهازى أى فرصة وقت دراستى بالأقصر للذهاب لأسوان والنوبة والنوبة القديمة ايضا

يا الله
كم هى ساحرة حتى وهى أطلال


دخلت موقع الفنان المصور
أبهرتنى نظرته للمشهد
متميز جداا بالفعل


ورغم كونى محجبة
إلا أنى أعرف يقينا" أن المظهر الخارجى والملبس ليس مقياسا"على الاطلاق لتقييم أخلاقيات أو سلوك
حتى وإن ارتبط فى عقول الناس أن المظهر هو عنوان السلوك

لكن من تجاربى الشخصية
كم من سافرة الرأس كما يسمونها
أجمل وأنقى وأصدق قلبا
من محجبة منافقة ساقطة كاذبة

والعكس بالعكس
والنتيجة
أنى نحيت المظهر والملبس من تقييمي تماماااااااا...ومن زمن بعيد
واعتمدت على العشرة والمواقف الحقيقية

وأخيرا
دعنى أحسد صديقك على احتفاءك وتقديرك له ولعمله

================

ألفاظك؟؟

بتكبسنى أحيانا
لكنى مؤمنة بحرية التعبير جدااا
وبالطريقة التى يراها صاحبها هى الأمثل
وأتناسى الألفاظ طالما الفكرة تغلغلت لتلافيف ربع كيلو اللحمة اللى فى الجمجمة...واستقرت فيها

Anonymous said...

ملحوظة أخرى للفنان صاحب الصور

سحرتنى صورة اليد الممسكة بالسيجارة

يمكن عينى غريبة فى رؤية الأشياء شوية
لكنى دائما طول ما انا ماشية او باتكلم مع حد او باشوف مدخن
أظل مثبتة نظرى على يده الممسكة بالسيجارة
وأتفحص كيفية امساكه وتعامله معها من كل الزوايا
مأعرفش لية
ومش كل إيد أو مسكة تلفت نظرى بشدة او أظل مركزة نظرى إليها
أظل فى تركيزى إلى أن يظن المدخن انى مجنونة
أو عينى فى السيجارة



صورتك
رائعة
شدتنى بقوة


إيد مين دي؟؟؟؟؟