Wednesday, September 27, 2006

Z

بعد رجوعي من عمان، قمت على طول ف البيت حافظ جميع ارقام صحابي اللي تعرفت عليهم هناك على الموبايل، و بالأخص أرقام اصحابي من تونس، اللي احنا كمصريين ارتبطنا بيهم اوي, و كنا احنا وهما والسوريين اقرب الوفود من بعض، أدبيا و إنسانيا، ما علينا، حفظت ارقام صحابي، و شوية و لقيت رقم بيبدأ بكود تونس بيرن لي، رنة صغيرة جدا بحيث ما شفتهاش الا بعدين. كنت لسة مسجل الارقام على ورق بالاضافة للموبايل، و كان فيه ارقام طبعا كتبتها على ورق واحنا ف عمان و مسجلتهاش على الموبايل لما رجعت. مالقيتش الرقم دا ولا رقم منها. كنت هتجنن, رنة دولية بتجيني و مش عارف من مين. اليوم اللي بعده جت لي نفس الرنة من نفس الرقم. بعت له مسج مهذب: "من انت؟ انا اسمي نائل. انت مين بقى؟" و رد عليا برنة صغيرة برضه.. و اتجاهل رسالتي خالص
مشكلة الرقم دا انه لما بيرن ما بيبطلش. يقعد على مدار نص ساعة يرن رنات صغيرة ييجي سبعة او تمانية. و يقطع بعد كدا لحد اليوم اللي بعده. مرة استلمته. فتحت عليه. محدش رد و الخط قطع على طول. و رن تاني. و فتحت عليه. و محدش رد و الخط قطع. و كدا ف السبع مكالمات اللي رنهم لي. لغاية ما ضميري ابتدا يعذبني. انا كلفت الراجل (أو الست، و دي حاجة انا بتمناها طبعا) تمن سبع مكالمات دولي. يا نهار اسود! في اليوم التالي وجدت نفسي اقترب بحذر من الموبايل وارن له. و مستريحتش الا لما رد لي الرنة برنة. حفظت الرقم عندي. سميته زد.. ودا علشان لما ارن له تبقى المسالة اسهل.. لان مفيش حد من المسجلين عندي على الموبايل اسمهم بيبدأ بحرف الزد
ف كل مرة بحاول اني اكلمه مكالمة طويلة من السنترال يبقى قافل الموبايل. مكنتش عارف انا عاوز اقوله ايه. بس اكيد السؤال عن هو مين مابقاش يشغل بالي.. يمكن بس حبيت اعرفه ان اسمه دلوقتي زد.. و اني سعيد جدا اني كسبت صديق جديد اسمه زد و اني هزعل اوي اوي لو مبقيناش على اتصال. واكيد كنت حابب اقول له كل سنة و هو طيب. كل سنة و انت طيب يا عم زد

9 comments:

3rby said...

قصة اللغز المحير...مستر زد

رجل المستحيل

اشتريه الان من اي مكتبه
:)

z said...

و أنت طيب يا نائل

nael said...

عربي
لغز محير فعلا. ما رأيك أنت؟"

زد
بقالك تلات تيام ما بترنش. لعل المانع خير. طمني عليك

أنا said...

Z!!!

Dananeer said...

يااه تخيل عندك حق ساعات بنفتقد ال زدات المجهولين و لو ان الواحد اعصابه بتتعب
انا مش باحب ارد على النمر الغريبه و لا اكلمهم

محمد أبو زيد said...

ده اللهو الخفي يا نائل

nael said...

عزيزي أنا
أيوة زد بعينه.. تعرفه؟
عزيزتي دنانير
فعلا ماحبش ارد على حد معرفهوش.. لكن في نفس الوقت احيانا بالاقي نفسي اموت و ارد على اي حد معرفهوش.. احيانا كثيرا ما يكون المجهول اليفا.. اكثر ألفة ممن تعرفينه
شكرا لمرورك الكريم
محمد ابو زيد
يا راجل؟؟؟؟؟ و فاكرني معرفش يا ولد

Anonymous said...

يا راجل طب كنت أقولبى كل سنة وأنت طيبة ولا لازم يعنى أكون زد

nael said...

العزيزة انونيموس
كل سنة و انتي طيبة يا ستي متزعليش