Friday, March 30, 2007

حقدنا المقدس على المحبوب



استكمالا للبوست السابق: بتبدأ اغنيتنا النهاردة بشكوى تقليدية، تقليدية اوي، من كون أنا - الشخص اللي بغني والشخص اللي بحب والشخص المتفاني والشخص المعذب في شخص واحد، مش عارف انام من كتر وجدي وتعذيبي، شكوى قديمة قدم الشعر العربي. جملة بسيطة: عيون القلب سهرانة مابتنامشي. حلو. الناس لسة وخمانة وحاسة انها بتسمع حاجة بتطربهم، حاجة سمعوا زيها قبل كدا كتير، ولسة مأسورين يمكن بالوش الملائكي للمغنية، البراءة والدعة الرهيبة. فجأة نجاة بتفجر قنبلتها. بتقارن بين نفسها وبين حبيبها في المميزات التي لدى كل منهما في موضوع السهر والارق والنوم: (وانا رمشي ما داق النوم/ وهو عيونه تشبع نوم). ومش بس بتقارن، الغل وصل بيها لدرجة انها تقول روح يا نوم من عين حبيبي. الغيرة من حبيبها عمت قلبها، وهذا افضل جدا
نادرا ما بنلاقي اغنية عربية بيتعلق موضوعها بالحقد، واقصد هنا الحقد الحقيقي، الغيرة السودا من شخص ما، وخلينا نكون مباشرين، الرغبة المخلصة في إيذاء الحبيب، مش علشان بيعذبنا في حبه، انما لانه بيتمتع بمميزات حياتية افضل منا، احنا ممكن نشتمه، اكيد هنغير عليه، لكن نغير منه هو تحديدا، وعلشان هو احسن مننا، نحقد عليه، ونحسده، دا امتياز لنجاة على ما اعتقد. واحد من اجمل امتيازاتها
على طول الاغنية نجاة، ومعاها الابنودي، مابيركزوش. بيفتكروا ان الاغنية عن الحب: (حبيبي آه من حبيبي/ عليه أحلى ابتسامة)، أو عن الشكوى من الارق: (ورحت معاه/ وما اداني الا السهر)، بس بين الحين والاخر بيحضر الموضوع اياه، كإنه مختزن في اللاوعي ومكبوت لصالح تقاليد الاغنية العربية الغرامية. فجأة المقارنة بتحضر بكل قوتها، وبشكل ساخر جدا: (هو يروح ويمشي/ وانا اسهر ما انامشي/ ياللي ما بتسهرشي/ ليلة يا حبيبي.) شفتو الترقيصة دي. دي بتشتغله. بتتكلم عن حبها ليه وبتشتكي من سهرها ف حبه، وفجاة بتناديه بياللي ما بتسهرشي. انت فاكر ياللي مابتسهرشي اني غيرانة منك علشان انا مش عارفة انام، يابن الجزمة ياللي واكلها والعة، كل دا بيطلع بسلاسة رهيبة من واحد من اكتر الوشوش طفولية ونعومة في تاريخ الغنا المصري


على آخر الاغنية، بس قبل الاخر بشوية، نجاة بتاخد حبوب الشجاعة، بتعترف ان الموضوع الرئيسي لاغنيتها ولحياتها كمان هو الحقد دا. سكوت، نجاة بتسكت شوية، المزيكا بتهدا شوية، تقريبا الناس حست ان فيه حاجة هتحصل، حاجة مهمة في مسيرة الاغنية، نجاة بتدي مقدمة تلطيفية قصيرة: (حبيتك يا حبيبي من غير ما اسال سؤال/ وهاسهر يا حبيبي مهما طال المطال) وفجأة. ارتقبوا القنبلة يا اولاد: (انا بس اللي محيرني وماخلانيش انام/ ازاي انا بقدر اسهر وازاي تقدر تنام). دا بس اللي شاغل حياتها كلها، يعني مش حبه اللي مسهرها، هي أكثر شرا من كدا بكتير. اللعبة سريالية، دايرة مقفولة على نفسها: انا بسهر علشان افكر انا ليه بسهر وانت بتنام. مسألة عبثية. الحب ورا خالص، الحب اتفه من انها تفكر فيه، وحبيبها كمان اتفه كتير، كله بييجي في مرتبة تالية بعد حقدها المقدس، حقدها الحبيب، حقدها المدلل، حقدها الملهِم، بكسر الهاء، اللي بيخليها تسهر وتفكر وتغني

13 comments:

محمد عز الدين said...

روقان أوي البوستات دي يا نائل باشا
بجد فكرة جميلة
تحياتي

Marwa abu daif said...

يا اخي حرام عليك بطل حقد علي العاشقات دول مساكين روح يا نوم من عين حبيبي بمعني ياا رب خليه يحبني زي مابحبه لان العشق ارتبط في اذهان الجميع بالسهر فكون يقول يمشي و هي تسهر متنامشي و هو ميسهرشي ليلة يا حبيب يبقي هو نصااااب قطعا و هي بتحب و حتي المسكينة مش عايزة تقول كده و لا تتهمه باي حاجة فبس دعت ربنا انه سهر و تساءلت ببراءه هو مبيسهرش ليه؟؟!!!! و هنا تحية كبيرة للابنودي لانه قدر يفهم براءة و عشق المراة المسكينة الغلبانة المخلصة المتفانية في عشقها

إبـراهيم ... said...

يخرب بيت فقرك ( ولا غناااك) يا نــائل بيه !! ، يا فقري ، تخيل بشوف البوست بتاعـك وأنا بسمع نجاة فعلاً !!! ... فكرتني بمقال بلال فضل كان كاتبه عن أغنية ( أشياؤه الصغرى تعذبني ) و بيتريق عليها بطريقته الفزييييعة نبعًا . . . .


بس إنتا إيه الروقان بتاعـك ده كلله صحيح ؟؟؟


عمومًا تحيااااااااتي


وفي انتظــار وعودكــ ....كلها :)

وأهي مروة شرحت لك المقصود من الأغنية ، على طريقة ( افهموا بقى ) ههههه

جبهة التهييس الشعبية said...

نجاة؟

نجاة يا قادر يا مفتري؟

طيب انا كنت عايزة اعرف تحليلك لمضمون

"تهجرني برضه احبك تلاوعني برضه احبك تنساني برضه احبك"

وبالنسبة ل

مش ح اتنازل عنك ابدا مهما يكوووووووووون

مهما يكون

مهما يكون

Anonymous said...

أممممممممممممممممممممم حرام عليك يا مفترى للى بتعمله في ده كل ما أغيب شويه وأرجع ألقيك مشوه أغنية بحبها.. يعنى الرومانسيه المقطره للى فى صوت نجاة موصلكش المعنى من كلامها ولا هى حبكت سخريتك حتى مع أنغام ونجاة
لو كان هدفك السخرية وخلاص والنبى سيبك من انغام ونجاة وفيروز وشوف حد تانى
ولو الغرض غيظ الناس الرومانسيه للى زيى هقولك أيه غير منك للى أكلت دراع جوزها
عموما بلوجك وانت حر يا سيدى شوه زيي ما أنت عايز وبرده هدخل عندك عشان أحرق دمى.
سلام

nael eltoukhy said...

الله يخليك يا عم عز والله انت اللي رايق

يا مروة صلي عالنبي. انتي بتقولي اني بحقد على العاشقات وانهم مساكين. طيب ازاي يبقوا مساكين واحقد عليهم. الطبيعي اني محقدش اللي على حد اعلى مني. ولذلك فانا احقد عليهم فعلا، مش علشان مساكين انما علشان يملكن من الشر ما لا املكه. وطبعا هنا انا بتكلم عن عاشقات روح يا نوم من عين حبيبي. طيب يا اختي انتي مبتناميش الليل انتي مالك بقى ومال الخلق التانيين، مش جايز يمكن يعني ولو بالصدفة مثلا ان واحد بيحبك وف نفس الوقت باسم الله ما شاء الله بينام وصحته بمب، وبعدين تقولي انا اللي بحقد. عجايب والله

يا اخ ابراهيم بس هقولك حاجة. الفضل ف البوست دا لكتاب عظيم لاحمد رجب اسمه الاغاني للارجباني، مش مقالة بلال فضل، احمد رجب في الكتاب دا متخيل كوكب اسمه الكوكب الغنائي وبيفحص الخصائص السيكلوجية والفيزيائية لمواطنيه، رموشه، قلبه، عزاله، كبده، سهره الليل. طبعا مش ممكن تقرا من غير ما تهلك على روحك من الضحك. كتاب ممتاز بجد في فحص الظاهرة الغنائية

الجبهة الجبهة الجبهة
طيب انتي كدا بتقترحي عملي دا كمحلل للاغاني يبقى بالقطعة ولا بمرتب. ممكن اريحك اوي في الشروط على فكرة بس انتي انوي بس

المجهولة
طيب انتي بتحبي الاغنية وبتتضايقي لما بشوهها، بس فعلا، ودي بصدق بقولها، انا مقدرش احبها الا لما اشوهها. دي حقيقة، بمعنى اني لازم ابص على الحاجات المختلفة اللي فيها، الحاجات المرعبة، وابرزها في دماغي علشان اقول اههه دا هنا كان فيه دماغ كويسة اوي. احم. اختلاف اذواق بقى يا استاذة

soha zaky said...

صديقى العزيز / نائل أزيك يابنى يا مشغول على طول على طول على العموم ربنا يوفقك ويكرمك فى مشوارك يارب ، وعلى فكرة انا عايزا اقولك ان اصبح لى مدونة وبقيبت يعنى كدا من ال المدونين على الارض وربنا يكرم ...ابقى تابع وقل رايك

nael eltoukhy said...

العزيزة سهى
الف الف مبروك وانا فتحتها وانبسطت بيها جدا. انا كنت مسافر ولسة جاي من يومين. انتي اخبارك ايه.. طمنيني عنك وانشاء الله من نجاح الى نجاح

soha zaky said...

نائل ، على فكرة بقى أنت عارف ان فيه كتاب من اجمل كتب الساخر العظيم أحمد رجب أسمه الأغانى "للأرجبانى " وكان ماشى فيه فى نفس الموضوع الساخر الرقيق اللى انت ماشى فيه دلوقتى ، وكان وقتها طبعا بيسخر من اغانى لعبد الحليمأغنية "ظلموه "وهو بيقول فيها جبت الطبيب يداوى سألنى الجرح فين ، قلت أسأل دق قلبى اللى زايد دقتين ، سمع فى القلب حاجة وقال دا رمش عين صاحبه رماه وناسى بقاله جمعتين " طبعا لك ان تتخيل ما فعله أحمد رجب فى الأغنية والله ما يتخير عنك وعلى هذا المنوال طول الكتاب سخرية مطابقة تماما لما تفعل انت الان وكأنك تستكمل رحلته الساخرة من الأغانى الشاعرية بالتحديد... لكن بجد انت كنت مخبى الحاجات دى فين ....

مَلَكة said...

أول مرة في حياتي ومن ساعة ما وعيت على الأغنية دي بالذات أشوف تحليل نفسي دقيق وجايب من الآخر كدة
بس للامانة معتقدش نجاة كان في بالها وهي بتغني كل الحقد ده على البعيد حبيبها:D

nael eltoukhy said...

سهى
الحمد لله اني كنت رادد على ابراهيم واشرت له لكتاب الاغاني للارجباني بالتحديد، يعني فضحت نفسي قبل ما حد تاني يفضحني، هههههههه، كنت مخبي دا فين، مش عارف. انتي رايك ايه؟

ملكة
لا طبعا اكيد نجاة ماكانش ف دماغها، بس انا واثق ان الابنودي كان ف دماغه، يعني روح يا نوم من عين حبيبي مش معقول تيجي صدفة بصراحة، لازم تكون مقصودة
منورة يا استاذة

To a friend said...

فعلا الجزء ده من الاغنية كنت باستعجب منه جدا

و غالبا لما بيكون عندي ارق باقول دي دعوة نجاة

تحليلك رائع للأغنية
تحياتي

Anonymous said...

Karen Millen Outlet The belts are designed in such a way that they give you casual and formal look. louisvuittonpurse1.webnode.jp